** COP29 Təşkilat Komitəsinin Yeddinci İclası Keçirildi **

Oktyabrın 1-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ilə bağlı Təşkilat Komitəsinin yeddinci iclası keçirildi.

Azərbaycan Respublikası Prezidentinin Administrasiyasının rəhbəri, Təşkilat Komitəsinin sədri Samir Nuriyev COP29 üzrə Tədbirlər Planının icrası ilə bağlı Prezident İlham Əliyevin tapşırıqlarına uyğun olaraq görülən işləri qeyd etdi.

Nuriyev bildirdi ki, Prezident İlham Əliyev COP29-a hazırlıq prosesini daim diqqət mərkəzində saxlayır və sentyabrın 10-da Bakı Olimpiya Stadionunda COP29-a hazırlıq işləri ilə tanış olaraq müvafiq tapşırıqlar və göstərişlər verdi.

Təşkilat Komitəsinin sədri, sentyabrın 22-23-də Nyu-Yorkda keçirilmiş "Gələcəyin Sammiti"ndə və BMT Baş Assambleyasının 79-cu sessiyasının ümumi müzakirələrində bir sıra dövlət və hökumət başçılarının COP29-a istinad edərək, noyabr ayında bütün dünyanın diqqətinin Azərbaycanda olacağını vurğuladı.

Samir Nuriyev COP29 Sədrliyi tərəfindən Bakıda sentyabr ayında müxtəlif vacib tədbirlərin, o cümlədən İtki və Zərər Fondunun 3-cü iclasının təşkil olunduğunu vurğuladı. O, Bakı İqlim Həftəsinin əldə etdiyi nəticələrin davamlı olacağına inandığını ifadə edərək, qarşıdan gələn tədbirlər arasında oktyabrın 10-11-də keçiriləcək Pre-COP tədbirinin vacibliyini xüsusi qeyd etdi.

Təşkilat Komitəsinin sədri, Prezident İlham Əliyevin inkişaf etməkdə olan kiçik ada dövlətlərinin COP29-da iştirakından irəli gələn məsələlərin həlli ilə bağlı verdiyi tapşırıqların həm bu ölkələr, həm də inklüzivliyin təmin olunması nöqteyi-nəzərindən beynəlxalq ictimaiyyət tərəfindən müsbət qarşılandığını bildirdi.

Samir Nuriyev dövlət qurumlarının COP29 çərçivəsində beynəlxalq tərəfdaşlarla birlikdə çoxsaylı tədbirlər keçirəcəklərini bildirdi. O, Azərbaycan QHT-lərinin "Gələcəyin Sammiti"ndə fəal iştirak etdiklərini və bunun nəticəsi olaraq 22 ölkədən 44 QHT nümayəndəsinin Azərbaycanın COP29-a ev sahibliyi edən ölkə kimi inklüzivliklə bağlı addımlarını dəstəkləyən bəyanat verdiyini vurğuladı.

Nuriyev daha sonra Bakı Olimpiya Stadionunda görülən işlər, nəqliyyatın təşkili, təhlükəsizlik, COP29 vizasının əldə edilməsi, informasiya təhlükəsizliyi ilə bağlı məsələlər haqqında danışaraq, onların həlli istiqamətində müvafiq tapşırıqlar verdi.

Ekologiya və təbii sərvətlər naziri, COP29-un müəyyən edilmiş Prezidenti Muxtar Babayev Nyu-York İqlim Həftəsi ərzində keçirilmiş görüşlər də daxil olmaqla, COP29-la bağlı ümumi gedişat barədə məlumat verdi.

Azərbaycan Respublikası Prezidentinin köməkçisi Anar Ələkbərov Bakı Olimpiya Stadionunda aparılan işlər və digər təşkilati-logistika məsələləri barədə məlumat verdi.

Xarici işlər naziri Ceyhun Bayramov BMT Baş Assambleyasının 79-cu sessiyası çərçivəsində keçirilmiş görüşlər və digər substantiv məsələlər barədə danışıb.

Maliyyə naziri Samir Şərifov iqlim maliyyəsi, bu kontekstdə Beynəlxalq Valyuta Fondu və Dünya Bankı ilə həyata keçirilən əməkdaşlıq barədə məlumat verdi.

Elm və təhsil naziri Emin Əmrullayev COP29 zamanı təhsil müəssisələrinin fəaliyyətinin təşkili barədə məruzə etdi.

Dövlət Təhlükəsizliyi Xidmətinin rəisi Əli Nağıyev COP29 zamanı təhlükəsizliyin təmin edilməsi məsələləri barədə danışıb.

Mədəniyyət nazirinin müavini Səadət Yusifova COP29 ilə əlaqədar Mədəniyyət Nazirliyi tərəfindən görülmüş işlər, o cümlədən “İqlim naminə mədəniyyət” təşəbbüsü barədə məlumat verdi.

Kənd təsərrüfatı nazirinin müavini İlhamə Qədimova COP29 ilə əlaqədar Kənd Təsərrüfatı Nazirliyi tərəfindən görülmüş işlər və “Harmoniya” təşəbbüsü barədə məlumat verdi.

İclasın sonunda COP29 Tədbirlər Planının icrası istiqamətində görülən işlərin davam etdirilməsi və digər aidiyyəti məsələlər üzrə tapşırıqlar verilib.