Əsəd ABŞ-ı Suriyadakı Vəziyyətdə Günahlandırdı

Suriya Prezidenti Bəşər Əsəd, ölkəsindəki vəziyyətin ağırlaşmasında ABŞ-ı birbaşa ittiham etdi. Haləb və İdlib kimi strateji əhəmiyyətli şəhərlərin düşməsindən sonra, Əsəd demək olar ki, Şama sıxışdırılıb.

Rusiya və İranın dəstəyinə baxmayaraq, Əsəd İran Prezidenti ilə telefon danışığı zamanı ABŞ-ın "bölgə xəritəsini öz maraqlarına uyğun şəkildə yenidən çəkməyə" çalışdığını bildirdi. Onun sözlərinə görə, terrorun artması, ölkənin parçalanması və xəritənin yenidən çəkilməsi ABŞ və Qərbin genişmiqyaslı planlarının tərkib hissəsidir.

Xatırladaq ki, noyabrın 27-də Haləbin qərb kənarında hökumət qüvvələri ilə müxaliflər arasında şiddətli döyüşlər başlamışdı. Müxaliflər qısa müddətdə bir çox ərazini ələ keçirərək Haləbin mərkəzinə doğru irəliləmişdilər. Bu hadisələrdən sonra Əsəd hakimiyyəti böyük bir zərbə almış və vəziyyət daha da gərginləşmişdir.