Xilas etdiyi 5 yaşlı qızla 20 il sonra görüşdü

Tanınmış həkim, Milli Məclisin deputatı Rəşad Mahmudov 20 il əvvəl ölüm riski ilə üz-üzə qalmış pasiyentinin tam sağalması barədə təsirli bir paylaşım edib. Həkim 2005-ci ildə Mərkəzi Neftçilər Xəstəxanasında 5 yaşlı Aytac adlı pasiyenti müalicə etmişdi. Qıza o zaman gecikmiş böyük VSD, ASD və ağır pulmonar hipertenziya (Eizenmenger sindromu) diaqnozu qoyulmuşdu. Həmin vaxt əməliyyat üçün şanslar çox aşağı idi. Bu cür ağır bir halın müalicəsi mütləq kompleks yanaşma tələb edirdi.

R. Mahmudovun sözlərinə görə, Heydər Əliyev Fondunun dəstəyi ilə, həmçinin italiyalı professor Ermanno Mazza və onun komandası ilə əməkdaşlıq çərçivəsində mərhələli müalicə aparıldı. Bu uzunmüddətli yanaşma nəticəsində 2015-ci ildə pasiyentin ürəyində tam korreksiya əməliyyatı uğurla baş tutdu. Bu əməliyyat Aytacın sağlamlığının bərpası yolunda atılan son addım idi.

Uzun illər keçdikdən sonra Aytac tam sağalmış şəkildə həkimin qəbuluna gəlib. Bu görüş sevinc doğursa da, həkim bir kədərli detalı da qeyd etdi. O bildirib ki, qızının sağlamlığı uğrunda illərlə mübarizə aparan Aytacın anası artıq həyatda deyil. Bu fədakar ana 49 yaşında qəflətən dünyasını dəyişib. Həkim öz düşüncələrini belə yekunlaşdırıb: “Mən düşünürəm ki, bəzən bir çarəsiz həyatın xilası üçün başqa bir ruh səssizcə çəkilib gedir”.