"Vərəm hələ də cəmiyyətdə qorxu və yanlış inanclar yaradır - Səhiyyə Nazirliyi

Səhiyyə Nazirliyi Elmi-Tədqiqat Ağciyər Xəstəlikləri İnstitutunun direktoru İradə Axundova vərəm xəstəliyinin cəmiyyətdə hələ də qorxu və yanlış inanclara səbəb olduğunu bildirib. Direktor Nazirliyin sosial media hesabındakı canlı yayım zamanı bu məlumatı açıqlayıb. Axundovanın sözlərinə görə, vərəm hava-damcı yolu ilə yayılır. Xəstə öskürəndə, asqıranda və ya danışanda vərəm mikobakteriyaları havaya buraxılır və yoluxmaya səbəb olur. Lakin bu, hər təmasda olan şəxsin dərhal yoluxacağı mənasına gəlmir. Risk altında olan şəxslər arasında xüsusilə immuniteti zəif olanlar-uşaqlar, yaşlılar, xroniki xəstələr-diqqətli olmalıdır.

Buna baxmayaraq, bəzi şəxslər üçün yoluxma riski digərlərindən xeyli yüksəkdir. Eyni evdə yaşayanlar, uzun müddət yaxın təmasda olanlar, həmçinin qapalı, havasız və günəş işığı az olan məkanlarda yaşayan insanlar daha çox risk altındadır. İ. Axundova təmas zamanı lazımi qorunma qaydalarına əməl etməyin vacibliyini qeyd edib. Məsələn, xəstənin qaldığı otaq gündə bir neçə dəfə açıq havaya verilməlidir. Xəstə öskürərkən mütləq maskadan istifadə etməli, ünsiyyət zamanı isə 1-2 metr məsafə saxlanması tövsiyə edilir.

Direktor həmçinin vərəm mikrobunu məhv edən mühüm bir detalı vurğulayıb. Günəş şüaları vərəm mikrobunu öldürür, buna görə də otağın işıqlı və təmiz olması çox vacibdir. Xəstə şəxs tənəffüs gigiyenasına diqqət yetirməlidir: öskürərkən ağzını örtməli, salfetdən istifadə etməli, sonra isə əllərini yumalıdır. Unutmaq olmaz ki, düzgün müalicə alan vərəmli insan bir neçə həftə sonra artıq yoluxucu hesab edilmir. Buna baxmayaraq, xəstə ilə təmasda olmuş şəxslər ildə bir dəfə flüoroqrafiya və Mantu/Diaskin test müayinəsindən keçməlidirlər.

Sonda İradə Axundova vərəmin müalicəsi mümkün olan bir xəstəlik olduğunu vurğuladı. Xəstəni təcrid etmək və ondan uzaqlaşmaq düzgün yol deyil. Əsas məqsəd müalicəni davam etdirmək, bu yolla həm xəstənin özünü, həm də ətrafdakı insanları qorumaqdır.