SOCAR “Sustainable Fitch” Beynəlxalq Reytinq Agentliyindən ilk ESG reytinqini alıb

Azərbaycan Dövlət Neft Şirkəti (SOCAR) 2023-cü ilin noyabr ayında “Sustainable Fitch” Beynəlxalq Reytinq Agentliyindən ilk ESG (Ətraf mühit, Sosial və İdarəetmə) reytinqini əldə edib. Agentlik şirkətin ümumi göstəricisini “3” səviyyəsində qiymətləndirib. Bu nəticə SOCAR-ın ESG sahəsində sabit və yetkin fəaliyyətini əks etdirir. SOCAR güclü risklərin idarəedilməsi bacarığına malikdir. Şirkət emissiyaların azaldılması hədəflərini ətraf mühitə təsir, müxtəliflik və idarəetmədə şəffaflıq sahələrindəki mövcud çağırışlarla balanslaşdırmağı bacarır. Sustainable Fitch reytinqləri “1”-dən “5”-ə qədər şkala üzrə təqdim olunur, burada “1” ən yüksək, “5” isə ən aşağı göstəricidir. Bu qiymətləndirmə təşkilatın ekoloji və sosial amilləri öz biznesinə, strategiyasına və idarəetməsinə inteqrasiya etmə səviyyəsini, eləcə də ümumi fəaliyyətini göstərir.

Bu reytinqin verilməsində SOCAR-ın dekarbonizasiya hədəfləri, sosial profilinin sabitliyi və effektiv risklərin idarəetmə sistemi əsas amillər kimi qeyd olunub. Şirkətin beynəlxalq ESG hesabatlılığına inteqrasiya prosesi də reytinqin alınmasına müsbət təsir göstərən əsas məqamlardandır. Bu qiymətləndirmə SOCAR-ın dayanıqlı inkişaf sahəsində əldə etdiyi nailiyyətləri və uzunmüddətli strateji hədəflərinin beynəlxalq investorların gözləntiləri ilə uyğunluğunu təsdiqləyir. SOCAR dekarbonizasiya hədəflərinə sadiqliyini əvvəllər də nümayiş etdirmişdi. Ötən il şirkət “MSCI” Beynəlxalq Reytinq Agentliyi tərəfindən Xəzər regionunda BBB səviyyəsində ESG reytinqi əldə edən ilk enerji şirkəti olmuşdu.

SOCAR-ın uğurları yalnız ekoloji və sosial sahələrlə məhdudlaşmır. Neft və qaz bazarlarında qiymət dalğalanması və əməliyyat volatilliyi kimi çətinliklərə baxmayaraq, şirkət sağlam maliyyə göstəricilərini qoruyub. Şirkətdə şəffaflığın və hesabatlılığın gücləndirilməsi mühüm nəticələr verdi. Bu fəaliyyətlər nəticəsində SOCAR tarixində ilk dəfə olaraq iki investisiya oluna bilən kredit reytinqi əldə etdi. Bunlar “Fitch” reytinq agentliyindən BBB- və “Moody`s” reytinq agentliyindən Baa3 dərəcələridir. “Sustainable Fitch Ratings” qlobal səviyyədə bütün aktiv bazarlara Ekoloji, Sosial və İdarəetmə göstəricilərinin qiymətləndirilməsi üçün həll təqdim edir. Bu cür qiymətləndirmələr beynəlxalq maliyyə bazarlarında daha dəqiq və məlumatlı qərarların qəbul edilməsində kömək edir, eyni zamanda SOCAR-ın uzunmüddətli sabitliyini göstərir.