Sahil Babayev: "Büdcə layihəsi zəfərdən rifaha uzanan inkişaf strategiyasının maliyyə təminatıdır"

Müstəqillik tariximizin ən böyük büdcə paketi olan 2026-cı ilin büdcə layihəsinin müzakirəsi, ölkəmizin böyük Zəfərinin beşinci ildönümünə təsadüf edir. Maliyyə naziri Sahil Babayev Milli Məclisin plenar iclasında "2026-cı il dövlət büdcəsi haqqında" qanun layihəsinin birinci oxunuşda müzakirəsində çıxış etdi. Nazir bildirdi ki, bu qələbə məhz Prezident İlham Əliyevin uzaqgörən və müdrik siyasəti, dövlət və ordu quruculuğunda aparılan ardıcıl islahatlar, həmçinin iqtisadi və maliyyə imkanlarının səmərəli səfərbərliyi nəticəsində qazanılıb.

Sahil Babayev əlavə etdi ki, təqdim edilən 2026-cı il büdcə layihəsi zəfərdən rifah cəmiyyətinə doğru uzanan inkişaf strategiyasının maliyyə təminatıdır. O vurğuladı ki, gələn ilin büdcə layihəsi tarixi Zəfərə gətirən yolun davamı kimi irəli sürülür. Ölkənin uzunmüddətli makroiqtisadi dayanıqlılığının əsas şərtləri mövcuddur: strateji valyuta ehtiyatları 82,5 milyard ABŞ dollarına çatıb, xarici dövlət borcu isə ÜDM-in cəmi 6%-i səviyyəsindədir. Bu göstəricilər iqtisadi siyasətin səmərəliliyini və islahatların müsbət nəticələrini göstərir. Həyata keçirilən çoxşaxəli islahatları beynəlxalq reytinq agentlikləri də nəzərə alır; "Fitch"dən sonra "Moody`s" də Azərbaycanın suveren kredit reytinqini investisiya dərəcəsinə qaldırıb.

Dövlətin getdikcə artan imkanları sosial təminatın möhkəmlənməsinə şərait yaratdı, bu da sosial rifah dövləti mövqeyinin güclənməsi deməkdir. Babayev dövlət başçısının təşəbbüsləri ilə 2025-ci ildə 5-ci sosial islahat paketinin reallaşdırıldığını qeyd etdi. Bu paket minimum əmək haqları, minimum pensiyalar, müavinət və təqaüdlərin məbləğlərinin artırılmasını əhatə edir. Bütün bu islahatlar cənab Prezidentin əhalinin, xüsusən sosial həssas qrupdan olan vətəndaşların rifahının daha da yaxşılaşmasına yönəltdiyi diqqətin növbəti göstəricisidir.