Onlayn qumar oyunları təşkil edən mütəşəkkil dəstənin məhkəməsi başlayıb

Bakı Ağır Cinayətlər Məhkəməsində onlayn qumar oyunlarının təşkili və cinayət yolu ilə əldə edilmiş vəsaitlərin leqallaşdırılması ittihamı ilə bağlı hazırlıq iclası keçirilib. Bu iş üzrə Yusif Baqiyev, Ramil Saadov və Samir Nəsibov mühakimə olunurlar. Proses hakim Fəxri Məmmədovun sədrliyi ilə baş tutub, iclasda əvvəlcə təqsirləndirilən şəxslərin anket məlumatları dəqiqləşdirilib. Təqsirləndirilən Baqiyevin vəkili Hikmət Əliyev, cinayət işinə xitam verilməsi barədə vəsatət təqdim edib. Digər vəkillər də məhkəməyə vəsatətlərinin olduğunu bildiriblər. Məhkəmə bu tələblərə baxılması məqsədilə iclası dekabrın 2-dək təxirə salıb. Baş Prokurorluğun Mətbuat xidmətinin məlumatına görə, bu cinayət işinə Korrupsiyaya qarşı Mübarizə Baş İdarəsində həyata keçirilmiş əməliyyat-axtarış tədbirləri nəticəsində başlanılıb və ibtidai istintaq mütəşəkkil dəstənin bir sıra üzvləri barəsində artıq tamamlanıb.

İbtidai istintaq sənədlərində qeyd olunur ki, Yusif Baqiyev və digərləri 2022-ci ilin əvvəllərindən 2025-ci ilin fevral ayınadək mütəşəkkil dəstə halında fəaliyyət göstəriblər. Onlar Pərviz Məmmədov, Ramil Saadov və hazırda axtarışda olan başqa şəxslərlə birləşərək qumar oyunları təşkil ediblər. Bu fəaliyyətləri nəticəsində xüsusilə külli miqdarda gəlir əldə edilib. Dəstənin üzvləri arasında rol bölgüsü aparılıb, onların məqsədi qumar oyunlarına çoxsaylı şəxsləri cəlb etmək, pul dövriyyəsini təmin etmək və fərqli şəxslərin adına çoxsaylı bank kartları açmaq olub. Onlar həmçinin “Paysis” MMC-nin rəhbəri Samir Nasibovla razılaşaraq cinayət yolu ilə əldə edilmiş gəlirin leqallaşdırılmasını həyata keçiriblər. Nasibov şirkətə məxsus pulköçürmə sistemlərində vəzifə saxtakarlığı edərək, ayrı-ayrı şəxslərin məlumatı olmadan onların adına elektron pul kisələri açıb. Bu yolla onlayn qumar oyunlarından əldə olunan 171 milyon manatdan artıq vəsaitin köçürülməsi təmin edilib.

Toplanan dəlillər əsasında müəyyən edilib ki, qanunsuz yolla əldə olunan bu vəsaitlərin 41 milyon manatdan artıq hissəsi sonradan müxtəlif bank hesabları vasitəsilə dövriyyəyə buraxılıb və əmlak alınması yolu ilə leqallaşdırılıb. İstintaq zamanı dəstə üzvlərinin istifadə etdikləri çoxsaylı bank kartları, elektron daşıyıcılar və nağd pullar maddi sübut kimi götürülüb. Yusif Baqiyev, Ramil Saadov və Pərviz Məmmədova Cinayət Məcəlləsinin mütəşəkkil dəstə tərəfindən cinayət yolu ilə əldə edilmiş əmlakı leqallaşdırma və xüsusilə külli miqdarda gəlir əldə etməklə qumar oyunlarının təşkili maddələri ilə ittiham elan edilib. Samir Nasibov isə bunlarla yanaşı, qumar oyunlarının təşkili və keçirilməsinə kömək etməkdə və vəzifə saxtakarlığında ittiham olunur. Yusif Baqiyev barəsində həbs qətimkan tədbiri seçilib, Pərviz Məmmədov ev dustaqlığında, Ramin Saadov və Samir Nəsibov isə polisin nəzarəti altındadırlar. İstintaq orqanı təqsirləndirilən şəxslərə aid 10 milyon manatdan artıq dəyərində olan əmlak üzərinə həbs qoyub. Cinayət işi məhkəməyə göndərilib, lakin cinayət əməllərində iştirak etməsi güman olunan və barəsində axtarış elan edilmiş digər şəxslərlə bağlı ibtidai istintaq hələ də davam etdirilir.