Lavrov ATƏT-i kəskin tənqid edib

Rusiyanın Xarici İşlər naziri Sergey Lavrov Avropada Təhlükəsizlik və Əməkdaşlıq Təşkilatındakı (ATƏT) hazırkı vəziyyəti kəskin tənqid edib. Nazir təşkilatdakı mövcud durumu acınacaqlı hesab edir. O, bu fikirləri "Rossiyskaya qazeta"da dərc edilən məqaləsində bildirib.

Lavrov ATƏT-in gələcəyi ilə bağlı nikbinliyə əsas görmür, çünki onun fikrincə, "Tunelin sonunda işıq yoxdur". Bununla belə, o, təşkilatın hələlik dağılmasının qarşısını almaq şansının olduğunu deyib. Bu şansdan yararlanmaq üçün ATƏT-in bütün üzvlərinin bərabərhüquqlu və qarşılıqlı hörmətli dialoq əsasında qurulan Helsinki prinsiplərinə geri dönməsi lazımdır.

Rusiya XİN rəhbəri, ATƏT-in əslində qurucuları tərəfindən nəzərdə tutulan funksiyaları yerinə yetirə bilmədiyini vurğulayıb. Təşkilatın əsas vəzifələri erkən xəbərdarlıq sistemini işə salmaq və mübahisələri həll etmək idi. Lakin Lavrovun sözlərinə görə, ATƏT regional münaqişələrin həllində dürüst vasitəçi ola bilməyib.