Deputat: Məhsəti Gəncəvi kimi tarixi şəxsiyyətlərə bu formada yanaşma milli-mənəvi dəyərlərdən tamamilə uzaqlaşmadır

Milli Məclisin üzvü Ceyhun Məmmədov Məhsəti Gəncəvi kimi tarixi şəxsiyyətlərə bu formada yanaşmanın milli-mənəvi dəyərlərdən və ənənələrdən tamamilə uzaqlaşma olduğunu söyləyib. Deputat bu cür addımların qətiyyətlə pislənməli olduğunu bildirib. O, sabiq mədəniyyət naziri Əbülfəs Qarayevin qızı Suad Qarayevanın çəkdiyi "Məhsəti" filmi barədə danışarkən bu fikirləri səsləndirib. Məmmədov deyir ki, Azərbaycanın tarixi şəxsiyyətləri haqqında belə bir yanaşma ortaya qoymaq milli-mənəvi dəyərlərə və ənənələrə ziyanlıdır, bu isə yolverilməzdir. Onun sözlərinə görə, Məhsəti Gəncəvi Azərbaycanın çox böyük və dəyərli şairələrindən biridir.

Ceyhun Məmmədov filmdə açıq-saçıq səhnələrin əksini tapmasını Azərbaycan tarixinə və mədəniyyətinə qarşı böyük hörmətsizlik adlandırıb. Deputat Azərbaycan xalqının zəngin tarixi və mədəniyyətinin olmasına diqqət çəkib. O vurğulayır ki, Azərbaycanın tarixi şəxsiyyətləri həmişə özlərinin yüksək mədəniyyəti, əxlaqı və tərbiyəsi ilə seçiliblər. Buna görə də, bu tip filmlər bizim mədəniyyətimizə, dəyərlərimizə və tariximizə qarşı ciddi bir hörmətsizlikdir. Məhsəti Gəncəvi böyük bir tarixi şəxsiyyət olub. Onun Azərbaycan tarixində və mədəniyyətində özünəməxsus dərin bir yeri və rolu var. Biz bu hörməti, dəyəri və yanaşmanı qorumalıyıq; mədəniyyətimizə qarşı bu cür addımlar qətiyyətlə pislənməlidir.

Qeyd edək ki, sabiq mədəniyyət naziri Əbülfəs Qarayevin qızı Suad Qarayevanın çəkdiyi "Məhsəti" filmində Məhsəti Gəncəvi obrazı Azərbaycan poeziyasının aparıcı qadın simvolu kimi tarixi kimliyindən təcrid edilib. Bu cür yanaşma filmdə açıq-saçıq səhnələrin yer alması ilə birlikdə, sosial şəbəkələrdə geniş narazılığa səbəb olub. Deputat Ceyhun Məmmədovun tənqidi bu narazılıq fonunda səsləndirilib.