Məhsəti Gəncəvi Azərbaycan xalqının kimliyinin, qədim mədəniyyətinin, tarixinin simvollarından biridir - RƏY

Millət vəkili Aydın Mirzəzadə bildirir ki, Məhsəti Gəncəvi Azərbaycan xalqının kimliyinin, qədim mədəniyyətinin və tarixinin mühüm simvollarından biridir. O qeyd edib ki, filmin müəllifi kim olursa olsun, bu tarixi həqiqət dəyişməz qalmalıdır. Məhsəti Gəncəvi XI əsrdə yaradıcılığı ilə tanınan azərbaycanlı qadın idi; bu fakt Azərbaycan xalqının qadına olan böyük hörmətini və qadının cəmiyyətdə tutduğu mövqeyini aydın göstərir. Deputat Məhsəti Gəncəvinin əsərlərinin bu gün də sevilərək oxunduğunu söyləyib. Buna görə də, onun haqqında çəkilən hər hansı bir film ancaq Azərbaycan qadınının obrazını ucaltmalı, onun şəxsiyyətinin zənginliyini və Azərbaycan mədəniyyətinin bütün parlaqlığını əks etdirməlidir.

Mirzəzadə filmlərdə yalnız sənətkarın fərdi həyatının deyil, həm də dövrün tarixi kontekstinin tam şəkildə təqdim edilməsini vacib sayır. O vurğulayıb ki, bu cür ekran əsərlərində həmin dövr Azərbaycan dövlətçiliyi, ictimai münasibətlər, eləcə də ədəbiyyatın inkişafı göstərilməlidir. Deputat əlavə edib ki, Nizami Gəncəviyə qədər Azərbaycanda 40-a yaxın tanınmış yazıçı və şair olub, Məhsəti Gəncəvi də o şəxslərdən biridir. Bizim belə zəngin ədəbi tariximiz olduğu halda, yaradıcı şəxslərdən bəhs edən filmlərdə mədəniyyətimizin gözəl tərəflərini göstərmək əvəzinə, onu küçə mədəniyyəti səviyyəsinə endirməməliyik. Millət vəkili bu cür cılızlaşdırmanın yolverilməz olduğunu bildirib.

Aydın Mirzəzadə sabiq mədəniyyət nazirinin qızı Suad Qarayevanın çəkdiyi "Məhsəti" filmi ilə bağlı yaranmış narazılığa da münasibət bildirib. O qeyd edib ki, həmin filmdə Məhsəti Gəncəvinin obrazı Azərbaycan poeziyasının aparıcı qadın simvolu olaraq, tarixdən təcrid edilmişdi və bu vəziyyət sosial şəbəkələrdə ciddi narazılığa səbəb olmuşdu. Deputat Mədəniyyət Nazirliyinin Ekspertiza Komissiyasına bu vəziyyətin qarşısını dərhal aldığına görə dərin təşəkkürünü çatdırıb. O hesab edir ki, bu addım mədəniyyətimizə oyunbazlıq kimi baxan şəxslərə çox ciddi bir xəbərdarlıq olmalıdır. Filmə qadağa qoyulması cəmiyyətin, ziyalıların və mədəniyyət nümayəndələrinin mədəni irsimizə qarşı olan yüksək həssaslığını göstərdi. Azərbaycan mədəniyyətini və incəsənətini heç bir zaman cılızlaşdırmağa razı ola bilmərik.