Deputat: "DSMF-nin büdcədən asıllılığının azaldılması üçün yığım potensialının artırılması daha sistemli olmalıdır"

Dövlət Sosial Müdafiə Fondunun (DSMF) dövlət büdcəsindən asılılığını daha da azaltmaq məqsədilə yığım potensialının artırılması ilə bağlı fəaliyyətlər daha sistemli aparılmalıdır. Bunun üçün konkret tədbirlər planının hazırlanması vacibdir.

Bu barədə deputat Vüqar Bayramov Milli Məclisin plenar iclasında çıxışı zamanı danışıb. İclasda "DSMF-nin 2026-cı il büdcəsi haqqında" və "İşsizlikdən Sığorta Fondunun 2026-cı il büdcəsi haqqında" qanun layihələrinin birinci oxunuşu müzakirə olunurdu. Deputat bildirdi ki, DSMF'nin büdcədən asılılığının azaldılması üçün yığım potensialını yüksəltmək əsas hədəf olmalıdır.

Vüqar Bayramov əlavə təkliflərini İşsizlikdən Sığorta Fondu (İSF) ilə bağlı səsləndirdi. O, İSF-nin büdcə layihəsi təqdim edilərkən aktiv sosial proqramlara yönəldilən vəsaitlərin səmərəliliyi haqqında xüsusi arayışın da verilməsini təklif etdi. Deputatın fikrincə, özünəməşğulluq proqramının nəticələri mütəmadi olaraq qiymətləndirilməlidir. O, İSF vəsaitlərindən sığorta məqsədi ilə daha çox istifadə edilməsi üçün sığortadan istifadə qaydalarına yenidən baxılmasını və meyarların sayının artırılmasını təklif etdi.

Nəhayət, deputat İSF büdcəsində saxlanma xərcləri üçün maksimum həddin müəyyənləşdirilməli olduğunu vurğuladı. Xərclərin optimallaşdırılması həyata keçirilməlidir. Bu addımlar fondun maliyyə dayanıqlılığını gücləndirməyə kömək edəcək.