“Bakıya Uçuş. İncəsənət Həftəsonu. Gələcəyi İNDİ Duy” layihəsi çərçivəsində Tofiq Cavadovun “Yarımçıq qalmış ömür” sərgisi açılıb (FOTO)

Azərbaycan Milli İncəsənət Muzeyində "Yarımçıq qalmış ömür" adlı sərgi açılıb. Bu sərgi Azərbaycan təsviri sənətinin ən orijinal simalarından biri – Tofiq Cavadovun (1925–1963) anadan olmasının 100 illiyinə həsr edilib. Tədbir Heydər Əliyev Fondu və IDEA İctimai Birliyinin təşkilatçılığı, Azərbaycan Mədəniyyət Nazirliyinin tərəfdaşlığı ilə keçirilən "Bakıya Uçuş. İncəsənət Həftəsonu. Gələcəyi İNDİ Duy" İncəsənət Festivalı çərçivəsində baş tutur.

Tofiq Cavadovun adı ölkənin incəsənət salnaməsinə azad düşüncənin və yaradıcılıq axtarışlarının simvolu kimi həkk olunub. Onun yaradıcılığı mövcud sənət qaydalarına meydan oxuyub. Rəssam öz dövrünün yeni estetik dəyərlərini və mənəvi axtarışlarını qabaqlayan sənətkarlardan biri kimi yadda qalıb. Cavadov cəmi 38 il ömür sürməsinə baxmayaraq, Azərbaycan incəsənətində yenilənmə enerjisi və rəng fəlsəfəsi ilə dolu bütöv bir dövrü arxada qoydu.

Açılış mərasimində Milli İncəsənət Muzeyinin direktoru Şirin Məlikova, Rəssamlar İttifaqının sədri Fərhad Xəlilov və incəsənətşünas Rafael Gülməmmədli çıxış etdilər. Çıxış edənlər Tofiq Cavadovun milli rəssamlıq məktəbinin inkişafındakı mühüm rolunu qeyd etdilər. Onlar vurğuladılar ki, onun irsi bu gün də müasir rəssamlar üçün tükənməz ilham mənbəyidir. Muzeyin əsərlərin bərpası və qorunması istiqamətində gördüyü işlər xüsusi diqqət çəkdi. Uzun illər müxtəlif kolleksiyalarda saxlanılan bu əsərlər ilk dəfə geniş ictimaiyyətə təqdim olunur.

Sərgidə 90-dan çox əsər, o cümlədən rəngkarlıq, qrafika və kitab illüstrasiyaları nümayiş etdirilir. Bu əsərlər Azərbaycan Milli İncəsənət Muzeyinə, Dövlət Rəsm Qalereyasına, Yeni Gallery-yə və şəxsi kolleksiyalara aiddir. "Yarımçıq qalmış ömür" sərgisi Tofiq Cavadovun fərqli yaradıcılıq dövrlərinə aid əsərləri ilk dəfə bir ekspozisiyada birləşdirir. Bu, tamaşaçılara rəssamın bədii düşüncə tərzinin təkamülünü izləmək imkanı verir – erkən, emosional kompozisiyalardan fəlsəfi dərinliyi olan yetkin dövr əsərlərinə qədər. O, milli motivlərlə avanqard axtarışları birləşdirməyə çalışırdı. Rəssamın daxili dram və simvolizmlə zəngin əsərləri bütöv bir nəslin mənəvi axtarışlarını əks etdirir. Sərgi noyabrın 30-dək Azərbaycan Milli İncəsənət Muzeyində davam edəcək.

"Bakıya Uçuş. İncəsənət Həftəsonu. Gələcəyi İNDİ Duy" İncəsənət Festivalı oktyabrın 31-dən noyabrın 2-dək Bakıda keçiriləcək. Layihənin müəllifi və təşəbbüskarı Heydər Əliyev Fondunun vitse-prezidenti Leyla Əliyevadır. Bu layihə Bakını müasir yaradıcılığın və kəşflərin canlı məkanına çevirməyi hədəfləyir. Festivalın əsas mövzusu sudur. Su, həyat, yenilənmə və dayanıqlı inkişafın rəmzi kimi seçilib. Xüsusi diqqət okean və dənizlərin ekoloji vəziyyətinə yönəldiləcək və bu mövzu incəsənətin dili ilə təqdim olunacaq.