Bakıda memarlıq abidəsinə zərər vurmaq cəhdinin qarşısı alınıb

Bakıda yerləşən tarixi memarlıq abidəsində qanunvericiliyin kobud şəkildə pozulması faktının qarşısı alınıb. Azərbaycan Respublikası Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinin əməkdaşları Mədəni İrsin Qorunması, İnkişafı və Bərpası üzrə Dövlət Xidməti ilə birgə şəhərsalma monitorinqi keçirirdi. Bu monitorinq zamanı Nəsimi rayonu, 28 May küçəsi 20 ünvanında (inv. № 2904) yerləşən abidədə ciddi pozuntular aşkarlandı. Dövlət Şəhərsalma və Arxitektura Komitəsi bu hadisə ilə bağlı məlumat verib.

Məlum olub ki, binanın fasadında, eləcə də 133,4 kv.m sahəsi olan qeyri-yaşayış obyektində heç bir icazə sənədi və müvafiq qurumlarla razılaşdırma olmadan özbaşına təmir-tikinti işləri aparılıb. Bakı Şəhər Memarlıq və Şəhərsalma Baş İdarəsi və Mədəni İrsin Qorunması Xidməti obyektin sahiblərini və aidiyyəti qurumları işlərin dayandırılması barədə əvvəlcədən xəbərdar etmişdi. Buna baxmayaraq, qanunsuz fəaliyyət davam etdirilib. Hətta pozuntular reklam banerləri ilə gizlədilməyə çalışılıb. Bu kimi hərəkətlər şəhərin tarixi-memarlıq mühitinə ciddi müdaxilə kimi qiymətləndirilir və dövlət mühafizəsində olan obyektə birbaşa zərər vurur.

Qurumlar dərhal müdaxilə edərək qanunsuz işləri dayandırıb. Binanın fasadı hazırda mütəxəssislərin nəzarəti altında ilkin vəziyyətinə qaytarılır. Qanun pozuntusu faktı barədə hüquq-mühafizə orqanlarına məlumat verilib. Bakı Şəhər Memarlıq və Şəhərsalma Baş İdarəsi bütün mülkiyyətçi və icarədarlara yenidən xəbərdarlıq edir. Binaların memarlıq görkəminə edilən hər hansı qeyri-qanuni müdaxilə qanunvericiliyin kobud pozuntusu hesab olunur. Bu cür pozuntuya yol verənlər barəsində qanunvericiliklə nəzərdə tutulmuş müvafiq tədbirlər görüləcək.