“Avrora” MMC “Qida təhlükəsizliyi tək dövlətin deyil, hər kəsin işidir” təşəbbüsünün iştirakçısı olub (FOTO)

Azərbaycan Respublikasının Qida Təhlükəsizliyi Agentliyi yanında Məşvərət Şurası “Qida təhlükəsizliyi tək dövlətin deyil, hər kəsin işidir” adlı kampaniyasını davam etdirir. Bu geniş təşəbbüs çərçivəsində hazırlanan sonuncu videoçarxda Şuranın üzvü, “Avrora” MMC-nin təsisçisi Ceyhun Abbasov iştirak edib.

Abbasov çıxışında qida təhlükəsizliyinə yanaşmada sistemliliyin və kompleksliyin vacibliyini vurğulayıb. Onun sözlərinə görə, məsuliyyət və nəzarət qida zəncirinin bütün mərhələlərində əsas prioritet sayılmalıdır. Bu mərhələlərə sadəcə istehsal deyil, həm emal, həm saxlanma, həm də daşınma daxildir.

Təsisçi bildirib ki, istehsalçı ilə istehlakçı arasında qət edilən yol həmişə risklərlə doludur. Məhz bu risklərin idarə edilməsi qida təhlükəsizliyinin təməl prinsiplərindən birini təşkil edir. Bu baxımdan, market rəfinə qədər gəlib çatan hər bir məhsulun arxasında geniş və çoxşaxəli bir sistem dayanır.

Ceyhun Abbasov vurğulayıb ki, həmin sistemin düzgün və davamlı şəkildə işləməsi yalnız cari keyfiyyəti müəyyən etmir. Bu iş, eyni zamanda, gələcək nəsillərin sağlamlığının qorunmasında böyük əhəmiyyət kəsb edir. Qida təhlükəsizliyinin təmin olunması yalnız dövlətin yox, bütün cəmiyyətin ortaq vəzifəsidir.