Yaponiya Türkiyə istehsalı PUA-lara maraq göstərir

Yaponiyanın artan təhlükəsizlik narahatlıqlarına cavab olaraq Müdafiə Nazirliyi rekord səviyyədə müdafiə büdcəsi tələb edib. 1 aprel 2026-cı ildən başlayacaq maliyyə ili üçün tələb olunan büdcə ölkə tarixində ən yüksək hərbi xərcləri əks etdirir. Bu, 2025-ci ildəki 8,7 trilyon yenlik əvvəlki rekord səviyyəni üstələyir.

Büdcə tələbindəki ən diqqətçəkən məqam pilotsuz uçuş aparatları (PUA) üçün maliyyələşdirmənin üç dəfə artırılmasıdır. Yaponiya müxtəlif növ pilotsuz sistemlərə 313 milyard yen (təxminən 2,12 milyard dollar) investisiya qoymağı planlaşdırır. Rusiya-Ukrayna müharibəsi zamanı PUA-ların effektivliyini müşahidə edən rəsmilər bildiriblər ki, Yaponiya bu sahədə imkanlarını sürətlə artırmalıdır.

Bu büdcəyə, həmçinin Yaponiyanın sahil müdafiəsini gücləndirmək üçün "QALXAN" adlı yeni sistemin inkişafı da daxildir. 2028-ci ilə qədər tamamlanması planlaşdırılan bu sistem, uzun mənzilli raketlər təsirsiz olduqda düşmən qoşunlarını sahilə daha yaxın məsafədə saxlamağı hədəfləyir.

Yaponiyanın PUA-lara marağı Türkiyə müdafiə sənayesini də diqqət mərkəzinə gətirib. Yaponiya Müdafiə Naziri general Nakatani bu ay Türkiyəyə səfər edərək Baykar və TAI şirkətlərinə böyük maraq göstərib. Səfər zamanı Bayraktar TB2, TB3 və Anka modelləri müzakirə olunub. Yapon mətbuatı da həmin vaxt ölkənin Türkiyə istehsalı PUA-lara marağını xəbər verib. Yaponiyanın nəzərdən keçirdiyi digər PUA istehsalçıları arasında ABŞ, Böyük Britaniya və Avstraliya da yer alır.

Maliyyə Nazirliyi tərəfindən araşdırıldıqdan sonra bu müdafiə büdcəsi təklifi hökumətin ümumi büdcə təklifinə daxil ediləcək ki, bu da 122 trilyon yeni (təxminən 828,5 milyard dollar) üstələyəcək.