Windows 11-də maraqlı səhv: Vista səsi geri döndü!

Microsoft şirkətinin Windows 11 əməliyyat sisteminin son test versiyasında maraqlı bir səhvi üzə çıxıb. Şirkət, bilmədən əməliyyat sisteminin açılış səsini 2007-ci ildə buraxılmış Windows Vista-nın xarakterik açılış səsi ilə əvəz edib. Səhv, ötən Cümə günü yayımlanan Windows 11 Dev Channel önizləmə versiyası 26200.5651-də aşkar edilib.

Windows 11 test edənləri kompüterlərini işə saldıqda, adi Windows 11 səsi əvəzinə tanış Vista melodiyası eşitdiklərini fərq ediblər. “imageres.dll” faylında səs faylının .WAV formatlı versiyasının Vista versiyasındakı ilə əvəz olunduğu müəyyən edilib. Microsoft səhvi tez bir zamanda təsdiqləyib və hadisə ilə bağlı Windows Insider buraxılış qeydlərinə rəsmi bəyanat əlavə edib.

Bəyanatda deyilir ki, “Bu həftəki buraxılış keçmişə maraqlı bir işarədir və Windows 11 əvəzinə Windows Vista açılış səsi ilə başlayır. Problemin həlli üzərində çalışırıq.” Windows Insider komandasından Brandon LeBlanc sosial media platforması X-də yazdığı paylaşımda məsələyə yumorlu yanaşıb: “Windows səs faylları ilə bir az oynadım və insanların təzə havaya ehtiyacı olduğunu düşündüm.” Beləliklə, bunun sadəcə bir proqram səhvi olduğunu təsdiqləyib.

Hazırda yalnız Dev Channel istifadəçilərini əhatə edən bu səs dəyişikliyi, Microsoft-un bəyanatına görə, gələn günlərdə veriləcək bir yeniləmə ilə düzəldiləcək. O vaxta qədər istifadəçilər kompüterlərini hər açdıqda nostaljik Vista dövrü melodiyası ilə qarşılaşacaqlar.