TSMC Almaniyada Çip Dizayn Mərkəzi Açaq!

Dünyanın ən böyük müqaviləli yarımkeçirici istehsalçısı TSMC, Almaniyanın Münhen şəhərində yeni bir çip dizayn mərkəzi açacağını elan etdi. Şirkət, 2025-ci ilin üçüncü rübündə fəaliyyətə başlaması planlaşdırılan bu mərkəzlə Avropadakı mövqeyini gücləndirəcək.

TSMC Avropa prezidenti Paul de Bot tərəfindən şirkətin 2025 Texnologiya Simpoziumunda verilən açıqlamaya görə, Münhendə yaradılacaq mərkəz yüksək sıxlıqlı, yüksək performanslı və enerjiyə qənaət edən çiplərin dizaynına yönələcək. Bu mərkəz avtomobil, sənaye sistemləri, süni intellekt və əşyalar interneti kimi sahələrdə fəaliyyət göstərən Avropa müştərilərinə xidmət göstərəcək.

Avropada istehsal və dizaynı bir araya gətirmək strategiyasının mühüm dayağı olan bu yeni dizayn mərkəzi, hazırda qurulmaqda olan şirkətin ESMC istehsal müəssisəsi ilə birlikdə işləyəcək. Sözügedən istehsal müəssisəsi Infineon, NXP və Robert Bosch ilə tərəfdaşlıq çərçivəsində həyata keçirilir və TSMC-nin Avropadakı ilk genişmiqyaslı istehsal investisiyasını təmsil edir. Bu iki müəssisənin əlaqələndirilmiş fəaliyyəti TSMC-nin Avropadakı müştərilərinə daha inteqrasiya olunmuş və çevik həllər təklif etməsinə imkan verəcək. Beləliklə, şirkət Avropa bazarı ilə yalnız istehsalda deyil, həm də dizayn mərhələsində daha sıx əlaqələr qurmağı hədəfləyir.

Bundan əlavə, TSMC həm Avropada, həm də qlobal miqyasda əsaslı investisiyalarını davam etdirir. ABŞ-ın Arizona ştatında ümumilikdə 65 milyard dollarlıq istehsal infrastrukturuna sahib olan şirkət, bu gücün 2027-ci ilə qədər tamamilə satıldığını bildirib.