Qualcomm-dan Texnoloji Sıçrayış: Snapdragon 8 Elite Gen 6 Seriyası 2nm Prosesi ilə Gəlir

Qualcomm şirkəti 2026-cı ilin ikinci yarısında təqdim etməyi planlaşdırdığı yeni flaqman mobil prosessor ailəsini- Snapdragon 8 Elite Gen 6 seriyasını elan edib. Əsas yenilik bu seriyanın iki fərqli versiyada bazara çıxarılmasıdır. Şirkətin ilk 2 nanometrlik həlli olan bu platforma, mobil texnologiyalar aləmində böyük bir irəliləyiş nümayiş etdirir.

Qualcomm, Apple-ın A20 seriyasında istifadə ediləcəyi gözlənilən N2 prosesindən fərqli olaraq, TSMC-nin daha qabaqcıl N2P proses düyünündən istifadə edən ilk mobil prosessor istehsalçıları sırasındadır. Bu yeni təmələ keçid mövcud dizaynların N2P prosesinə asanlıqla adaptasiya olunmasına şərait yaradır. Bu dəyişiklik təkcə enerji sərfiyyatında əhəmiyyətli üstünlüklər verməklə qalmayacaq, həm də prosessorların çoxnüvəli işləmə qabiliyyətini ciddi şəkildə artıracaq.

Yeni seriyada ən diqqətçəkən məqam isə məhsul çeşidinin genişləndirilməsidir. Standart Snapdragon 8 Elite Gen 6 modelindən əlavə, Qualcomm daha yüksək performanslı Snapdragon 8 Elite Gen 6 Pro variantını da buraxacaq. Hələlik bütün məlumatlar rəsmi təsdiqlənməsə də, sızan xəbərlər göstərir ki, Pro versiyası standart modelə nisbətən bəzi üstün xüsusiyyətlərə malik olacaq. Buraya daha yüksək tezlikdə işləyən nüvələr, gücləndirilmiş qrafik prosessor (GPU), genişləndirilmiş keş yaddaşı tutumu, həmçinin LPDDR6 və UFS 5.0 dəstəyi daxildir.

Bildirilir ki, Qualcomm öz Mərkəzi Prosessor (CPU) arxitekturası üçün yeni 2+3+3 sxeminə keçib. Bu yeni dizayn enerji səmərəliliyini əhəmiyyətli dərəcədə yaxşılaşdıracaq. Xüsusilə daha aşağı tezliklərdə işləyən üç nüvənin əlavə edilməsi, gündəlik tapşırıqlarda batareya ömrünə müsbət təsir göstərəcək. 2026-cı ilin ikinci yarısında debüt edəcək bu prosessor ailəsi mobil cihazların performansı və enerjiyə qənaət sahəsində yeni standartlar müəyyənləşdirə bilər.