Kaliforniyanın benzinli avtomobil qadağası ləğv edildi

ABŞ Senatı Kaliforniyanın 2035-ci ilə qədər benzinlə işləyən avtomobillərin satışını qadağan etmək qərarını ləğv etdi. Senat səsverməsində 51 senator qərarı ləğv etmək, 44 senator isə qaydanı qüvvədə saxlamaq üçün səs verdi. Qanun layihəsi indi prezident Donald Trampın təsdiqi üçün təqdim ediləcək.

Kaliforniya qubernatoru Gavin Newsom tərəfindən 2020-ci ildə imzalanmış icra sərəncamına əsasən, 2035-ci ilə qədər ştatda satılan bütün yeni minik avtomobilləri və yüngül ticarət avtomobilləri sıfır emissiyalı olmalı idi. İcra sərəncamına görə, bu avtomobillərin ən azı 80 faizi tam elektrikli, qalanı isə qoşula bilən hibrid olmalı idi. Qubernator Newsom bildirdi ki, Konqresin ləğv qərarına qarşı məhkəməyə müraciət edəcəklər.

Kaliforniya ABŞ-da ən sərt ekoloji siyasətə malik ştatlardan biridir. Ştat illərdir ki, iqlim dəyişikliyinə qarşı mübarizənin bir hissəsi olaraq karbon emissiyalarını azaltmaq məqsədilə qaydalar hazırlayır. Lakin bu siyasət dəfələrlə Tramp administrasiyasının ətraf mühit qaydaları ilə toqquşub. Donald Tramp vəzifəsinin ilk günündə ABŞ-ın Paris İqlim Sazişindən çıxmasını nəzərdə tutan icra sərəncamı imzaladı və sonra kömür istehsalını artırmağa yönəlmiş qaydaları həyata keçirdi.

Federal ləğv qərarı ştatın ətraf mühit qanunları üzərində müstəqilliyini şübhə altına aldı. Əgər prezident Tramp qanun layihəsini imzalasa, Kaliforniyanın sıfır emissiyalı nəqliyyat vasitələri strategiyası hüquqi cəhətdən etibarsız olacaq. Bu hadisə ABŞ-da oxşar qaydalar hazırlayan digər ştatlara da təsir edə bilər.