iPhone 18-də 12 GB RAM Standart Olacaq: Süni İntellektin Yeni Tələbi

Yeni məlumatlara görə, "Apple" qarşıdan gələn iPhone 18 seriyasının yaddaş (RAM) həcmini xeyli artıracaq. Cənubi Koreya mediasının yaydığı xəbərə görə, yeni model əvvəlki nəsilə nisbətən 50% daha çox yaddaşa malik ola bilər. Bu potensial artım "Apple"ın cihaz daxilində süni intellekt (Sİ) emalı imkanlarına verdiyi böyük önəmi göstərir. Görünür, şirkət bazarda güclü Sİ funksiyalarını yerləşdirmək üçün bütün modellərin yaddaşını bərabərləşdirməyi planlayır.

Xatırladaq ki, "Apple"ın son iPhone 17 seriyası (Air, 17 Pro və 17 Pro Max) 12 GB RAM ilə təqdim edilmişdi. Bu, əvvəlki modellərlə müqayisədə 4 GB ciddi artım idi və bu yüksəltməyə əsas səbəb cihaz daxilində işləyən Sİ funksiyalarının artan yaddaş tələbatı idi. Lakin standart iPhone 17 modeli 8 GB RAM-dan istifadə etməyə davam edirdi. Son məlumatlara görə, iPhone 18 seriyası ilə bu vəziyyət dəyişəcək. "Apple" bütün iPhone 18 modellərində "yaddaş bərabərliyinə" nail olmağı hədəfləyir. Bu strategiya, standart iPhone 18 modelinin 8 GB RAM ilə bazara çıxmayacağını göstərir.

Bu gözlənilən artımın arxasında maraqlı bir texniki səbəb dayanır. Hesabatda qeyd edilir ki, "Apple" iPhone üçün əsas RAM təchizatçısı olan "Samsung" ilə əlaqə saxlayıb və yeni seriya üçün LPDDR5X çiplərinin tədarükünü artırmağı xahiş edib. Lakin "Samsung"un 2024-cü ildə buraxacağı yüksək performanslı LPDDR5X çipləri yalnız 12 GB və 16 GB konfiqurasiyalarında mövcuddur. Bu, texniki bir məhdudiyyət olaraq, standart iPhone 18 modelinin ən azı 12 GB yaddaşa sahib olacağını təmin edir. Əgər standart model 8 GB-dan 12 GB-a qalxarsa, bu, məhz 50% artım demək olacaq və əvvəldən yayılan iddiaları təsdiqləyəcək. Şirkət əlavə mobil DRAM tədarükü üçün "SK Hynix" və "Micron" ilə də danışıqlar aparır.

Hesabat "Apple"ın gələcək buraxılış cədvəli haqqında da maraqlı təfərrüatlar verir. iPhone Air 2, iPhone 18 Pro, iPhone 18 Pro Max və qatlana bilən iPhone modellərinin 2026-cı ilin payızında təqdim edilməsi gözlənilir. Standart modellərin isə 2027-ci ilin birinci yarısında bazara çıxarılacağı iddia olunur. Bu, "Apple"ın Pro və standart modellər üçün buraxılış strategiyasını ayıracağını göstərir. Bütün iPhone 18 modellərinin RAM həcmini bərabərləşdirmək qərarı, xüsusən də standart modeli seçəcək istifadəçilər üçün əməliyyat sürətində xeyli irəliləyiş gətirəcək.