Günəş Enerjisi Hüceyrələri İstehsalında Böyük Sıçrayış

Azərbaycanın qonşu ölkəsi Türkiyədə günəş enerjisi hüceyrələri istehsalında əhəmiyyətli bir irəliləyiş müşahidə olunur. Xarici asılılığı azaltmaq məqsədilə, sənaye və texnologiya naziri Mehmet Fatih Kacırın açıqlamasına görə, beş şirkət tərəfindən təxminən 100 milyard TL-lik investisiya yatırılacaq. Bu, enerji texnologiyalarında yerli istehsalın artırılmasına və iqtisadiyyata böyük töhfə verəcək.

Hazırda Türkiyədə günəş panelləri istehsal edən bir çox şirkət olsa da, panellərin əsas komponenti olan günəş hüceyrələrinin istehsalı məhdud miqyasda aparılırdı. Yeni investisiyalar bu boşluğu doldurmağı hədəfləyir. Layihəyə daxil olan şirkətlər və investisiyaların ediləcəyi şəhərlər müəyyənləşdirilib: Alfa Solar Energy (Kırklareli – 390 milyon dollar), Astronergy High Technology (Adana – 584 milyon dollar), CW Solar Cell Energy (Antalya – 520 milyon dollar), Elin Semiconductor Technologies (Sivas – 387 milyon dollar), Schmid Pekintaş Solar Energy Systems (Düzce – 683 milyon dollar).

Bu layihələrin tamamlanması ilə 20 mindən çox insanın birbaşa işlə təmin olunacağı və illik cari hesab kəsiri əvəzinə 12 milyard dollarlıq töhfənin əldə ediləcəyi bildirilir. Bu investisiyalar Türkiyəni günəş enerjisi komponentləri üzrə regional istehsal bazasına çevirə bilər. Hazırda Ankarada Kalyon PV-yə məxsus inteqrasiya olunmuş günəş hüceyrəsi zavodu mövcuddur. İzmir’də Smart Güneş şirkətinin də oxşar bir müəssisə qurmağa hazırlaşdığı məlumdur.