TRT-nin Van’da Günəş Elektrik Stansiyası

Türkiyə Radio və Televiziya Qurumu (TRT), Van’da qurduğu Günəş Elektrik Stansiyası (GES) ilə yayım sektorunda enerji keçidinin öncüsü oldu. 127 min kvadratmetr ərazidə, cəmi iki ayda tamamlanan stansiya il ərzində təxminən 18 milyon kilovat-saat (18.000 MWh) elektrik enerjisi istehsal edəcək. Bu istehsal sayəsində TRT, ümumi elektrik enerjisi ehtiyacının 20%-ni özünün istehsal etdiyi təmiz enerjidən ödəyəcək.

16.992 yüksək effektiv günəş panellərindən ibarət olan stansiya, Türkiyə yayım sektorunda bu miqyasda ilk bərpa olunan enerji investisiyasıdır. GES layihəsi yalnız qurumun enerji xərclərini azaltmağı deyil, həmçinin ekoloji cəhətdən təmiz yayım yanaşmasının qurulmasını hədəfləyir. TRT Baş Direktoru Prof. Dr. Mehmet Zahid Sobacı layihə ilə bağlı açıqlamasında bildirdi ki, “ictimai resurslardan səmərəli və effektiv istifadəyə əsaslanan bu ekoloji addım, TRT-nin enerji istehsalında müstəqil olmaq hədəfinə atılan ilk strateji addımdır”. Sobacı bu stansiyanın bir başlanğıc nöqtəsi olduğunu və gələn dövrdə TRT-nin müvafiq ərazilərində oxşar layihələrin həyata keçiriləcəyini vurğuladı.

Qurumun son hədəfi öz enerjisini tam özü istehsal edə bilən bir yayımçı olmaqdır. Van’dakı günəş elektrik stansiyasına edilən investisiya sadəcə TRT-ni enerji ilə təmin etməkdən kənara çıxaraq, yayım sektorunda yaşıl dönüşümün konkret nümunəsi kimi ön plana çıxır. Bu təşəbbüs, dövlət qurumlarının ekoloji cəhətdən təmiz istehsal modellərinə keçid üçün istiqamətverici bir nümunədir və enerji effektivliyi və davamlılıq baxımından uzunmüddətli strategiya çərçivəsində dəyərləndirilir.