Suriyada Yeni Təhlükəsizlik Qaydaları Elan Edildi

Suriyada Baas rejimini devirən qüvvələr əhalinin can və mal təhlükəsizliyinin təmin edilməsi üçün yeni təhlükəsizlik qaydaları elan ediblər. Hərbi əməliyyatlar rəhbərliyindən verilən açıqlamada əhalinin can və mal təhlükəsizliyinin, dövlət əmlakının qorunması üçün yeni tədbirlərin görüləcəyi bildirilib.

Yeni qaydalara əsasən, hər hansı bir səbəbdən qəsdən atəş açanlara 1 il, dövlət əmlakı, nəqliyyat vasitələri və texnikası oğurlayanlara 3 il həbs cəzası veriləcək. Başqasının əmlakına qarşı hücum edənlər də 3 il həbs cəzası ilə üzləşəcəklər. Dövlətə məxsus silah saxlayan və onu müvafiq qurumlara təhvil verməyənlər isə 4 il həbs cəzası alacaqlar. Təhlükəsizlik tədbirləri çərçivəsində paytaxt Şamda saat 16:00-dan səhər 05:00-dək komendant saatı elan edilib.

Suriyada baş verən hadisələrə gəlincə, 27 noyabrda rejim əleyhinə silahlı qruplar və Bəşər Əsəd qüvvələri arasında toqquşmalar şiddətlənib. 30 noyabr - 7 dekabr tarixlərində Haləb, İdlib, Həmə və Hums kimi ən böyük şəhərlərdə müxalifət qüvvələri üstünlük əldə edib. 7 dekabrda paytaxt Şamı ələ keçirən qruplara əhalinin dəstək verməsi ilə rejim Şam və ölkənin bir çox yerlərində nəzarəti tamamilə itirib, süquta uğrayıb. 61 illik hakimiyyəti sona çatan Baas Partiyası və rejim rəhbəri Əsəd isə paytaxdan qaçmağa məcbur olub. Suriya Milli Ordusu isə Türkiyə sərhədinə yaxın ərazidə PKK/YPG terror təşkilatının işğalında olan Tel Rıfatı azad etdikdən sonra Mənbiçdə yuvalanmış terrorçulara qarşı əməliyyatlara başlayıb.