Suriyada müharibənin gedişatı: Hələb, İdlib, Hamadan sonra Homs da düşmənin əlindən alındı

Noyabrın 27-də Bəşər Əsəd rejiminə qarşı silahlı müxalif qruplar tərəfindən başlanan əməliyyatlar nəticəsində Hələb, İdlib və Tel Rıfatdan sonra dünən axşam saatlarında Hama şəhəri də azad edildi.

Cəbhədəki sürətli irəliləyiş: Müxaliflər heç bir müqavimətlə rastlaşmadan irəliləyirlər. Son xəbərlər isə bölgədəki vəziyyətin gərginləşdiyini göstərir.

Homs şəhərinə 5 kilometr qalıb: Paytaxt Şama gedən yolda son maneə hesab edilən Homs şəhərinə müxalif qüvvələrin 5 kilometr qaldığı bildirilir. Məlumatlara görə, Əsəd rejimi Homsda irəliləməni maneə törətmək üçün strateji əhəmiyyətli nöqtələrə hava hücumları həyata keçirir.

Homsla Şam arasında yalnız 2 saatlıq məsafə: Homs və Şam arasındakı məsafə təxminən 163 km olub, iki saatlıq yoldur. Əgər müxalif qüvvələr Homsu da ələ keçirərsə, onların qarşısında Şama gedən yolda son əsas maneə El-Nəbek vilayəti qalacaq.

Suriyada vəziyyət: Noyabrın 27-də Hələb vilayətinin qərb kənarında Əsəd rejimi ilə rejim əleyhinə silahlı qruplar arasında şiddətli döyüşlər başlamışdı. Noyabrın 30-da rejim əleyhinə qruplar Hələbin mərkəzinin böyük hissəsini ələ keçirmiş və eyni gündə İdlibin bütün ərazisini nəzarət altına almışdı. Şiddətli döyüşlərdən sonra dekabrın 5-də Hama şəhəri də azad edildi. Suriya Milli Ordusunun dekabrın 1-də Hələb kənarında PKK/YPG terror təşkilatına qarşı başlatdığı "Azadlığın Şafağı" əməliyyatı çərçivəsində Tel Rıfat şəhəri də terrorçulardan təmizlənmişdir.