İsrail-Hizbullah arasında atəşkəs yaxındır

ABŞ və Fransanın prezidentləri İsrail və Hizbullah arasında 36 saat ərzində atəşkəs elan olunmasını gözlədikləri barədə məlumatlar yayılıb.

İsrail Baş Naziri Binyamin Netanyahu'nun keçən gecəki təhlükəsizlik müşavirələrində Hizbullahla yeni atəşkəs razılaşmasını "prinsip etibarilə" təsdiqlədiyi bildirilir. CNN International-ın verdiyi xəbərə görə, hökumətə yaxın mənbələr İsrailin Livan hökumətinə təqdim etdiyi razılaşmanın bəzi təfərrüatları ilə bağlı hələ də tərəddüd etdiyini söyləyib.

Reuters agentliyinin məlumatına görə, dörd yüksək vəzifəli Livan mənbəyi ABŞ Prezidenti Co Bayden və Fransanın Prezidenti Emmanuel Macronun İsrail və Hizbullah arasında 36 saat ərzində atəşkəs elan olunmasını gözlədiklərini bildiriblər. Fransanın prezident sarayı və Ağ Ev hələ ki bu məsələ ilə bağlı açıqlama verməyiblər.

İsrail mətbuat orqanı Haaretz isə atəşkəs təklifinin üç mərhələdən ibarət olduğunu iddia edir. Birinci mərhələdə Hizbullah qüvvələri Litani çayının şimalına çəkiləcək. Bu addımı İsrail qüvvələrinin Livan sərhədlərindən geri çəkilməsi izləyəcək. Üçüncü və son mərhələdə isə İsrail və Livan arasında mübahisəli sərhəd bölgələrinin müəyyən edilməsi üçün danışıqlar başlayacaq. Digər tərəfdən, Hizbullahın geri çəkildiyi ərazilərə Livan ordusu yerləşdiriləcək.

Bu plan 2006-cı ildə Hizbullah və İsrail arasındakı müharibəni sona çatdıran BMT Təhlükəsizlik Şurasının qərarına əsaslanır.

İsrail hökumətinin sözçüsü David Mencer Livanda atəşkəsə doğru irəliləmə olduğunu, ancaq həll edilməsi lazım olan bəzi "problemlər" olduğunu bildirib. İsrail dövlət televiziyasına danışan və adı açıqlanmayan bir məmur isə Livanda atəşkəsə nail olmaq üçün aparılan danışıqlarda "əhəmiyyətli irəliləyiş əldə olunduğunu" söyləyib. İsrailli məmur, Livanda atəşkəsə "əvvəlkindən daha yaxın olunduğunu" vurğulayaraq, "Sürpriz olmazsa, gələn günlərdə bir razılaşma (atəşkəs) ola bilər" deyib.