Deportasiyanı pozmaq hədəsi: Səhvən azad edilən miqrant cinayətkara 500 funt niyə verildi?

Böyük Britaniyada həbsxanadan səhvən sərbəst buraxılan miqrant cinsi cinayətkar, deportasiya prosesini pozmaqla hədələdikdən sonra ona 500 funt-sterlinq (təxminən 1070 AZN) ödənilib. BBC-nin əldə etdiyi məlumata görə, Həduş Kebatu adlı bu şəxs Böyük Britaniyadan Etiopiyaya deportasiya edilməli idi.

Həduş Kebatu Esseks ştatının Eppinq şəhərində yerləşən sığınacaq otelində yaşayarkən 14 yaşlı qıza və bir qadına qarşı cinsi təcavüz etdiyi üçün həbs cəzası almışdı. Lakin ötən cümə günü həbsxana əməkdaşları onu səhvən sərbəst buraxıblar. İki gün davam edən geniş axtarışdan sonra cinayətkar yenidən nəzarət altına alınıb və dərhal deportasiya prosedurlarına başlanılıb.

Daxili İşlər Nazirliyi bildirib ki, Etiopiya vətəndaşı çərşənbə axşamı axşam reysi ilə təyyarəyə mindirilib və ertəsi gün səhər yerə enib. Ən maraqlı məqam isə deportasiya qərarının icrası zamanı cinayətkara edilən ödənişdir. Anlaşılan odur ki, bu 500 funt-sterlinq məbləğindəki pul, çıxarma qrupu tərəfindən verilmiş əməliyyat qərarı idi. Bu addım, daha yavaş və baha başa gələcək hüquqi proseslərə alternativ olaraq qəbul edilib.

Məqsəd, Kebatunun ölkədən çıxarılması zamanı problem yaratmasının qarşısını almaq idi. Beləliklə, məhkəməyə getmədən və ya uzun bürokratik prosedurlara cəlb olunmadan miqrantın deportasiya edilməsi təmin edilib. Bu qeyri-adi ödəniş, Böyük Britaniya hökumətinin bəzən deportasiya proseslərini sürətləndirmək üçün istifadə etdiyi müxtəlif taktikalardan biri kimi qiymətləndirilir.