Britaniyada maraqlı hadisə, miqrantı səhvən azad etdilər

Böyük Britaniyada məhkum miqrant Haduş Kebatu böyük bir səhv nəticəsində azadlığa buraxılıb. O, cümə günü Çelmsford həbsxanasından çıxarkən, əslində deportasiya üçün saxlanma mərkəzinə göndərilməli idi. Lakin əvəzində səhvən sərbəst buraxılıb. Böyük Britaniya hökuməti bu hadisəyə görə ciddi tənqidlərə məruz qalıb, lakin miqrantın sərbəstliyi uzun sürməyib.

Kebatu yeniyetmə qıza cinsi zorakılıq etdiyi üçün həbs olunmuşdu. Onun ölkəyə kiçik qayıqla daxil olduğu bildirilirdi. Xoşbəxtlikdən, Haduş Kebatu bazar günü səhər saatlarında Londonun Finsbury Park ərazisində polis tərəfindən tutulub. Onun tutulmasında ictimaiyyət üzvünün verdiyi məlumat əsas rol oynayıb.

Baş nazir Kir Starmer inzibati səhvin necə baş verdiyinə aydınlıq gətirmək üçün təhqiqat başladıldığını deyib. Hökumət, cinsi zorakılıq cinayəti törətmiş bir şəxsin deportasiya əvəzinə azadlığa buraxılmasının səbəblərini araşdırır.