Çinin Hərbi Gücünün Nümayişi

Pekin şəhərində keçirilən Qələbə Paradında Çin ən son və ən müasir hərbi texnologiyalarını nümayiş etdirdi. Prezident Si Cinpinin rəhbərlik etdiyi bu mərasim, Asiyada İkinci Dünya Müharibəsinin bitməsinin 80-ci ildönümünə həsr olunmuşdu.

Dünyanın diqqətlə izlədiyi bu tədbirin ən diqqətçəkən hissəsi isə "Şərq küləyi 5C" (DF-5C) qitələrarası ballistik raket oldu. Çin dövlət mediasının verdiyi məlumata görə, DF-5C-nin mənzili 20000 kilometrdən çoxdur və bu, ona dünyanın istənilən nöqtəsini vurma imkanı verir. Bu imkan Pekinin qlobal caydırıcılıq qabiliyyətini əhəmiyyətli dərəcədə artırır.

Raket əvvəlki DF seriyası raketlərdən və DF-41 modelindən əldə edilmiş təcrübə əsasında hazırlanıb. Modulyar quruluşu sayəsində raket üç ayrı hissədə daşına bilər ki, bu da hazırlıq müddətini çox qısaldır. Ekstrem sürəti müdafiə sistemlərinə reaksiya vermək üçün heç bir vaxt qoymur, çoxlu döyüş başlığı (MIRV) qabiliyyəti isə nüvə, konvensional və ya saxta başlıqlar yerləşdirməyə imkan verir. Bu da müdafiə sistemləri üçün raketin vurulmasını demək olar ki, mümkün olmur edir. İnersiya sistemi, ulduz işıqlandırma və Çinin Beidou peyklərindən istifadə edərək raket hədəfləri yüksək dəqiqliklə vurur.

Çin hökuməti nüvə silahından azad zonaları hədəf almayacağına dair bəyanatını təkrarlayaraq “ilk istifadə etməmək” prinsipinə sadiq qalacağını bildirdi. Hərbi ekspertlərin fikrincə, bu kontekstdə DF-5C Çinə potensial hücumlara qarşı effektiv cavab vermə əminliyini verir. Eyni zamanda, raketin 10 fərqli hədəfi eyni vaxtda vura biləcəyi də bildirilir.

Paradda DF-5C yeganə nümayiş olunan silah sistemi deyildi. JL-1 və JL-3 sualtı raketləri, J-35 gizli qırıcı təyyarəsi, GJ-11 pilotsuz döyüş təyyarəsi və H-6J uzun mənzilli bombardmançı təyyarələri də Çinin nüvə üçlüyünü təmsil edirdi. İlk dəfə nümayiş olunan sistemlər arasında süni intellektli sürülər halında uçan pilotsuz təyyarələr, AJX002 və HSU100 sualtı pilotsuz aparatları yer alırdı. Mərasimdə yeni YJ seriyası gəmi əleyhinə raketlər və Çinin "dünyanın ən güclü lazer hava hücumundan müdafiə sistemi" adlandırdığı LY-1 (Jing Lei-1) lazer silahı da yer alırdı.

Paradda hava hücumundan müdafiə və kəşfiyyat qabiliyyətləri də vurğulandı. Xüsusilə təyyarə daşıyıcılarında istifadə üçün hazırlanan və Çinin Fujian hərbi gəmisində tezliklə xidmətə daxil olması gözlənilən KJ-600 erkən xəbərdarlıq təyyarəsi də ilk dəfə ictimaiyyətə təqdim olundu. Parad Çinin genişlənən pilotsuz təyyarə qabiliyyətlərini və modernləşdirilmiş hərbi gücünü dünyaya nümayiş etdirdi.