Pərviz Şahbazov: "Azərbaycanın ümumi elektrik enerjisi istehsalı gücü 9 700 MVt-ı keçib"

Yeni elektrik stansiyalarının istifadəyə verilməsi nəticəsində Azərbaycanın ümumi elektrik enerjisi istehsal gücü 9 732,5 MVt-a çatıb. Energetika naziri Pərviz Şahbazovun Energetiklər Günü ilə bağlı məqaləsində verilən məlumata görə, bu göstərici ötən ilin müvafiq dövrü ilə müqayisədə 1317 MVt və ya 15,6% artım deməkdir. Bu yüksək artımda ölkəmizin və bütövlükdə Cənubi Qafqazın ən böyük enerji müəssisəsi olan "8 Noyabr" Elektrik Stansiyasının böyük təsiri var. Cənubi Qafqazın ən böyük enerji müəssisəsi sayılan bu stansiya 1 880 MVt gücündədir və şanlı Zəfərimizi əbədiləşdirir.

Nazir qeyd edib ki, bu yeni stansiya Mingəçevirin tək Azərbaycanın deyil, regionun energetika mərkəzi kimi mövqeyini gücləndirir. "8 Noyabr" Stansiyasının istismara verilməsi enerji səmərəliliyi baxımından önəmlidir. O, həmçinin Çin və İtaliya şirkətləri ilə əməkdaşlıq sayəsində elektroenergetika sahəsində beynəlxalq tərəfdaşlığın yaxşı bir nümunəsidir.

Elektroenergetika sistemində hazırda fəaliyyət göstərən stansiyaların detallı gücü açıqlanıb. Ölkədə ümumi gücü 7 903 MVt olan 24 istilik elektrik stansiyası, 1 443,5 MVt-lıq 65 su elektrik stansiyası və 278,2 MVt gücündə 9 günəş elektrik stansiyası işləyir. Bunlara əlavə olaraq, 63,5 MVt gücündə 5 külək elektrik stansiyası, 37 MVt gücündə bərk məişət tullantıları elektrik stansiyası və ümumi gücü 7,3 MVt olan 3 hibrid elektrik stansiyası mövcuddur. Su elektrik stansiyaları daxil olmaqla, bərpa olunan enerji mənbələri üzrə elektrik stansiyalarının gücü 1 829,6 MVt-a çatır. Bu rəqəm ümumi istehsal gücünün təxminən 18,8%-ini təşkil edir. Generasiya artımı ilə yanaşı, elektrik şəbəkəsinin gücü də bu dövrdə artaraq 29 714 MVA-a çatıb.

Pərviz Şahbazov bildirib ki, son illərdə artan istehsal gücü Azərbaycanın enerji balansında sabitliyi qorumağa kömək edir. Ötən il ölkədə cəmi 28,4 milyard kVt·st elektrik enerjisi istehsal olunub. Bunun 24,1 milyard kVt·st-ı daxili tələbatın ödənilməsinə, 1,4 milyard kVt·st-ı isə ixraca yönəldilib. İdxal isə sadəcə 70,7 milyon kVt·st təşkil edib. Cari ilin ilk 9 ayında 21,8 milyard kVt·st enerji istehsal edilib, ixrac 989,6 milyon, idxal isə 145 milyon kVt·st həcmində olub. Nazirin fikrincə, elektrik enerjisi istehsalında əsas artım dinamikasını məhz bərpa olunan enerji mənbələri formalaşdırır. Məsələn, 230 MVt gücündə "Qaradağ" Günəş Elektrik Stansiyası fəaliyyətə başladığı iki ilə yaxın müddətdə günəş enerjisindən elektrik enerjisi istehsalının 10 dəfə artmasına şərait yaradıb. Bu stansiyada 1 milyard kVt·st elektrik enerjisinin istehsalı, Azərbaycanın "yaşıl enerji" sahəsində qoyduğu məqsədləri ardıcıl şəkildə həyata keçirdiyini təsdiqləyir.