COP29-dan COP30-a keçid və XIII Qlobal Bakı Forumuna hazırlıq mövzusunda yüksək səviyyəli görüş keçirilib

Paris Sülh Forumu çərçivəsində "COP29-dan COP30-a: Qlobal İqlim Dialoqunun İrəlilədilməsi və XIII Qlobal Bakı Forumuna Hazırlıq" mövzusunda yüksək səviyyəli görüş keçirilib. Bu tədbir Nizami Gəncəvi Beynəlxalq Mərkəzinin təşkilatçılığı ilə baş tutub. Görüşdə dünyanın müxtəlif ölkələrindən sabiq dövlət və hökumət başçıları, beynəlxalq təşkilat rəhbərləri, parlament üzvləri və ekspertlər iştirak ediblər. Serbiyanın sabiq prezidenti Boris Tadiç tədbirin moderatoru olub. Görüşün əsas məqsədi COP29-un nəticələrindən irəli gələrək COP29-dan COP30-a keçid prosesini, qlobal iqlim maliyyələşməsi problemlərini və dayanıqlı inkişaf sahəsində mövcud çağırışları müzakirə etmək idi.

Dialoq zamanı iştirakçılar iqlim fəaliyyətinin gələcəyi üçün vacib olan bir sıra regional və beynəlxalq məsələlərə toxunublar. Müzakirə olunan mövzular arasında "Caspian Sea agenda" da yer alıb; bu gündəlik Xəzər dənizinin hüquqi statusu, enerji və ekoloji əməkdaşlıqla bağlı aktual məsələləri əhatə edir. Nizami Gəncəvi Beynəlxalq Mərkəzi son illərdə iqlim gündəliyinə mühüm töhfələr verib. Mərkəz London və Bakı İqlim Fəaliyyəti Həftələrini, eləcə də Pekin, Daşkənd və Nyu-Yorkda yüksək səviyyəli toplantıları təşkil edib. Parisdə keçirilən bu tədbir də Mərkəzin davamlı fəaliyyətlərinin mühüm hissəsi hesab olunur.

Tədbirdə çıxış edənlər arasında COP29 Prezidenti və Azərbaycan Respublikası Prezidentinin iqlim məsələləri üzrə nümayəndəsi Muxtar Babayev də yer alırdı. Görüşdə həmçinin COP20, COP21, COP22, COP24 və COP30 Prezidentləri, Şimali Makedoniya Prezidenti Qordana Silyanovska-Davkova, Latviyanın xarici işlər naziri Baiba Braze, Fransa Senatının vitse-prezidenti Xavier İokavelli, Yunanıstanın sabiq Baş naziri Georgios Papandreu və Avropa Mərkəzi Bankının sabiq Prezidenti Jan-Klod Trişe kimi nüfuzlu liderlər iştirak ediblər. Görüş çərçivəsində 2026-cı ilin mart ayında baş tutacaq XIII Qlobal Bakı Forumuna dair xüsusi müzakirələr aparılıb və Forumun təqdimatı keçirilib.