Almaniyalı baş məşqçi azərbaycanlı futbolçunu bağışlamağa tələsmir
Rusiyanın "Spartak" klubunun baş məşqçisi Domeniko Tedesko bir müddət öncə əvəzedici heyətə göndərdiyi azərbaycanlı futbolçu Ayaz Quliyevi hələlik əsas komandaya qaytarmağı düşünmür.
Bu barədə almaniyalı mütəxəssis yerli "Sport24" nəşrinə geniş müsahibəsində deyib.
O bildirib ki, bu məsələ gündəmdə deyil: "Ayazla problemimiz oldu. Hazırda o, əsas komandada deyil. Amma klub daxilində baş verənlər içəridə qalmalıdır. Bunu ictimaiyyətə açıqlamırıq. Futbolçunun indi qayıtmasını planlaşdırmırıq. Lakin hər şey mümkündür. Qapılar hər zaman açıqdır. Bu, bizim üçün problem deyil".
Qeyd edək ki, Ayaz Quliyev məşq vaxtı fiziki hazırlıq üzrə məşqçi Vladimir Çipzanoviçlə münaqişəyə girdiyi üçün "Spartak"ın əvəzedici komandasına göndərilib.
