"Real" Alonsonun yerinə əfsanəvi məşqçini gətirmək istəyir

"Real Madrid" klubunun rəhbərliyi hazırda yaranmış böhranı ciddi şəkildə nəzərdən keçirir. Klubun direktorlar şurası təcili iclas çağırıb. Müzakirənin əsas mövzusu baş məşqçi Xabi Alonsonun komandadakı gələcəyidir. Əgər Alonso istefaya göndərilərsə, klubun rəhbərliyi legend Zinəddin Zidanı bu posta təyin edə bilər.

Mənbələr bildirir ki, "Real" daxilindəki müəyyən dairələr artıq Zidanın namizədliyini dəstəkləyirlər. Xabi Alonsonun işdən çıxarılması ilə bağlı müzakirələr klubda yaranmış ciddi narazılıqdan irəli gəlir. Böhranın səbəbləri arasında bəzi ulduz futbolçuların mövqeyi xüsusi yer tutur. Məlumata görə, komandanın aparıcı oyunçuları Alonsonun tətbiq etdiyi oyun fəlsəfəsini bəyənmirlər.

Bu fikir ayrılığı məşqçinin komandadakı mövqeyini xeyli zəiflədib. Direktorlar şurası Alonsonun komandada qalma ehtimalını müzakirə etsə də, oyunçuların narazılığı ciddi bir problem olaraq qalır. Zinəddin Zidanın adı "Real Madrid" üçün yad deyil. O, daha əvvəl Madrid klubuna rəhbərlik edərək bir sıra böyük uğurlara imza atmışdı. Bu fakt, onun potensial namizədliyini gücləndirir. Daha əvvəl Zidanın Fransa milli komandasında işləyə biləcəyi barədə xəbərlər dərc edilmişdi. İndi isə "Real" böhranı aradan qaldırmaq üçün tanış və uğurlu bir sima axtarır.