Qış şaxtalı və qarlı olacaq - Proqnoz

Bu il payızın nisbətən isti, yəni anomal keçməsi qarşıdakı qış mövsümünün sərt olacağı ilə bağlı ehtimalları artırıb. Hava şəraiti ilə bağlı proqnoz verən mütəxəssislər kəskin soyuqların olacağını bildirirlər. Coğrafiya İnstitutunun şöbə müdiri, ekoloq Ənvər Əliyevin sözlərinə görə, qarşıdan gələn qış şaxtalı və qarlı olacaq.

Mütəxəssis müşahidə edilən bu cür hava dəyişikliklərinin əvvəllər də nadir hallarda qeydə alındığını xatırladır. Belə dəyişikliklərin ardınca qış aylarında kəskin şaxtalı günlər yaşanıb. Əliyev deyir ki, qışın bir qədər sərt keçməsi mövcud problemləri artıracaq. O, uzunmüddətli hava proqnozlarının tam dəqiq olmadığını vurğulasa da, yenə də ehtiyatlı davranmağı zəruri hesab edir. İnsanlar soyuq havaya hazırlaşmalıdırlar.

Ekoloq şaxtalı qışın gətirəcəyi müsbət bir nəticəni də açıqlayıb. O əlavə edib ki, qarın və şaxtanın bolluğu müəyyən ziyanvericilərin yaşıllıqları məhv etməsinə mane olur. Bu, təbiətin zərərli həşəratlardan qorunması üçün təbii bir mexanizm rolunu oynayır. Beləliklə, sərt hava şəraiti bitkilərə müəyyən fayda verə bilər.