Mərkəzi Bank oktyabrın 22-də nə qərar verəcək?

Azərbaycan Mərkəzi Bankı (AMB) bu həftə, oktyabrın 22-də uçot faiz dərəcəsi ilə bağlı növbəti qərarını elan edəcək. Bu qərar ölkə iqtisadiyyatı üçün önəmli bir göstəricidir. Mərkəzi Bank sonuncu dəfə iyulun 23-də, yəni son bir ildə ilk dəfə olaraq uçot dərəcəsini 7,25%-dən 7%-ə endirmişdi. Daha sonra, sentyabrın 10-da isə bu göstərici sabit saxlanıldı.

İqtisadçı Fuad İbrahimov növbəti qərarın hansı istiqamətdə olacağı barədə açıqlama verib. İbrahimov AMB-nin iyul ayında faizləri endirməsini xatırladaraq, uçot dərəcələrinin azaldılmasının hər zaman iqtisadi aktivliyin artırılmasına xidmət edən bir siyasət olduğunu qeyd edir. İbrahimov Mərkəzi Bankın son üç ildəki fəaliyyətini yüksək qiymətləndirir. Onun fikrincə, qurum müstəqillik dövründə ən çevik, tarazlığı qoruyan və sabitlik istiqamətində addımlayan maliyyə institutlarından biridir.

AMB mövcud iqtisadi şəraitdə əlindəki bütün alətlərdən məharətlə istifadə edir. Bu isə ona həm daxili sabitliyi, həm də maliyyə sisteminin dayanıqlığını qorumağa kömək edir. Postpandemiya dövrünün yaratdığı qlobal inflyasiya dalğası həm dünya, həm də Azərbaycan iqtisadiyyatına ciddi təsir göstərir. Bu şəraitdə Mərkəzi Bankın apardığı siyasət ilk növbədə inflyasiyanın cilovlanmasına yönəlmiş effektiv özünümüdafiə mexanizmi formalaşdırır.

İbrahimov bildirir ki, bu tarazlığı qorumağa imkan verən fəlsəfə və siyasət uğurla davam etdirilir. Əgər uçot dərəcələrinin azalması prosesi ardıcıl şəkildə davam edərsə, bu, iqtisadi aktivliyin artırılmasına xidmət edən yumşaq monetar siyasətin göstəricisi olacaq. Bu addım eyni zamanda inflyasiyanın plan üzrə idarə olunmasına yönəlmiş siyasətin təsdiqi kimi də qiymətləndirilə bilər.

İqtisadçı əlavə edib ki, uçot dərəcəsi azalsa da, stabil qalsa da, Mərkəzi Bankın monetar siyasəti mövcud makroiqtisadi tarazlıq fonunda qorunub saxlanılır. Bu istiqamətdə atılan addımlar ümumi iqtisadiyyatın sabit və idarəolunan bir dəhlizdə - yəni üfüqi dalğalanma çərçivəsində inkişaf etdiyini göstərir. Azalma meyli inflyasiyanın planlı tənzimlənməsinin göstəricisidir. Bu proses həm də iqtisadi aktivliyin artırılması istiqamətində atılmış müsbət bir addım kimi də dəyərləndirilməlidir. Hər bir halda, bu dinamikanı konkret zaman və şərait daxilində diqqətlə izləmək vacibdir.