Lənkəranda “Dövlət suverenliyi və milli birliyin qorunmasının ideoloji əsaslar” adlı tədbir baş tutdu

Oktyabrın 21-də Lənkəran Dövlət Universitetində (LDU) “Dövlət suverenliyi və milli birliyin qorunmasının ideoloji əsaslarının təhlili” mövzusunda vacib bir tədbir keçirilib. Bu konfrans Suverenlik və Konstitusiya ili çərçivəsində Bakı Politoloqlar Klubu və LDU-nun tərəfdaşlığı ilə baş tutub. Tədbirin keçirilməsi səbəbi aydındır: bu gün regionda hibrid təhdidlər, ideoloji təxribatlar və dezinformasiya xarakterli təbliğat ciddi aktuallıq kəsb edir. Qlobal informasiya müharibəsi gücləndikcə gənclərin yad təsirlərə məruz qalması cəmiyyətin ideoloji təhlükəsizliyi üçün real risk yaradır. Buna görə də, gənclərin xarici müdaxilələrdən qorunması, onlara milli ideologiyanın və vətənpərvərlik dəyərlərinin sistemli şəkildə aşılanması həm dövlət, həm də cəmiyyət üçün strateji prioritet hesab olunur. Tədbirdə şəhərin professorları, ziyalıları, ictimai fəalları, gənclər və tələbələr iştirak ediblər.

Konfrans Azərbaycan Respublikasının dövlət himninin səsləndirilməsi ilə başlayıb. Daha sonra Ümummilli Lider Heydər Əliyevin və Azərbaycanın ərazi bütövlüyü uğrunda canlarını fəda etmiş qəhrəman şəhidlərimizin xatirəsi bir dəqiqəlik sükutla yad edilib. Giriş sözü ilə çıxış edən Lənkəran Dövlət Universitetinin rektoru, professor Natiq İbrahimov konfransın mövzusunun nə qədər önəmli olduğunu vurğulayıb. Rektor bildirib ki, qlobal informasiya müharibələrinin və hibrid təhlükələrin artdığı bir dövrdə bu cür maarifləndirmə tədbirlərinin xüsusilə sərhədyanı və strateji bölgələrdə təşkili böyük əhəmiyyət daşıyır. O, həmçinin qeyd edib ki, LDU dövlətçilik və milli dəyərlər ruhunda yetişən gənclərin formalaşmasını əsas vəzifəsi kimi müəyyənləşdirib. Lənkəran Şəhər İcra Hakimiyyəti başçısının müavini Ülviyyə Əliyeva da seminarda çıxış edərək bu cür tədbirlərin gənc nəslin milli dəyərlərə bağlılığının möhkəmləndirilməsi üçün mühüm töhfə verdiyini diqqətə çatdırıb.

Tədbirdə Bakı Politoloqlar Klubunun sədri Zaur Məmmədov hazırki çağırışlar fonunda milli birliyin vacibliyinə toxunub. O, Ulu Öndər Heydər Əliyev tərəfindən təməli qoyulan və Prezident İlham Əliyev tərəfindən davam etdirilən ideoloji siyasətin əsas istiqamətlərindən danışıb. Zaur Məmmədov mədəni assimilyasiya təhlükələri, rəqəmsal əsrdə milli kimliyin qorunması və Azərbaycana qarşı aparılan ideoloji müharibə mövzularında geniş fikir mübadiləsi aparıb. YAP Lənkəran rayon təşkilatının sədri İqbal Əmənullayev informasiya təhlükəsizliyinin təmin edilməsinin milli birliyin qorunmasında əsas şərt olduğunu söyləyib. Dini Qurumlarla İş üzrə Dövlət Komitəsinin nümayəndəsi Emin Həmidli isə xarici qüvvələrin dini zəmində nifaq salmaq cəhdlərindən bəhs edib, dövlətin ardıcıl dini siyasətinin tolerantlığı möhkəmləndirdiyini bildirib. Politoloq Zaur İbrahimli cənub regionlarının gənclərinin diqqət etməli olduğu məqamları önə çəkərək, vətəndaş-dövlət həmrəyliyi kimi dəyərlərin qlobal informasiya mühitində qorunmasının mühüm əhəmiyyət daşıdığını söyləyib. Tədbir Bakı Politoloqlar Klubu, Qeyri Hökumət Təşkilatlarına Dövlət Dəstəyi Agentliyi və LDU-nun təşkilati dəstəyi ilə baş tutub.