İcra başçılarına qadağa qoyuldu

Balakən rayon icra hakimiyyətinin başçısı İslam Rzayevin oktyabrın 30-da Dövlət Təhlükəsizliyi Xidməti (DTX) tərəfindən saxlanılmasından sonra, rayon rəhbərlərinin üzərindəki təzyiq xeyli artıb. İcra başçıları ilə bağlı əməliyyatların davam edəcəyinə və yeni həbslərin olacağına dair iddialar geniş yayılır. Bu ehtimallar, Qaradağ rayon icra hakimiyyəti başçısının müavini Nadir Muradovun və bir neçə başqa vəzifəli şəxsin noyabrın 1-də saxlanılmasından sonra daha da gücləndi. Əldə edilən məlumata görə, bu hadisələrin fonunda, kənd rayonlarına rəhbərlik edən məmurlara bir sıra məhdudiyyətlər tətbiq edilib. Onların çalışdıqları rayonları icazəsiz tərk etməsi qadağan olunub.

Kənd rayonlarına rəhbərlik edən icra başçılarının əksəriyyəti paytaxt Bakıda yaşayır. Onlar həftəlik iş rejiminə uyğun olaraq cümə günü Bakıya gəlir və bazar ertəsi günorta işlərinin başına qayıdırdılar. Tətbiq edilən yeni qaydaya görə, məmurlara ciddi zərurət olmadığı halda işlədikləri rayonları tərk etməmək tapşırılıb. Bu təlimat, icra başçılarının əvvəlki kimi rahat şəkildə paytaxta gediş-gəliş etməsini faktiki olaraq dayandırır.

Bu məhdudiyyət hüquq-mühafizə orqanlarının fəaliyyətinin səmərəsini artırmaq məqsədi daşıyır. Artıq korrupsiya, rüşvət və vəzifə səlahiyyətlərindən sui-istifadə ilə məşğul olan məmurların qapısını həftənin bütün günləri döymək mümkün olacaq. Fəaliyyətində ciddi qanunsuzluqlara yol verən icra başçıları üçün Bakıya səyahət edərək təzyiqdən yayınmaq imkanı azalır. Bu addım, icra strukturlarında qanunsuz hərəkətlərin qarşısının alınması və yerlərdə nəzarətin gücləndirilməsi istiqamətində atılmış ciddi tədbir kimi qəbul edilir.