​Halit Ergençdən illər sonra "Sultan Süleyman" etirafı

Türkiyənin məşhur aktyoru Halit Ergenç illər sonra "Muhteşem Yüzyıl" serialı ilə bağlı açıqlama verib. Sevilən aktyor qonaq olduğu yutub kanalında bu tarixi roldan danışıb.

Hazırda "Kral kaybederse" serialında çəkilən Halit Ergenç keçmişə qısa bir ekskursiya edib. Aktyor 4 mövsüm davam edən və rekord qıran tarixi serialda baş rol ifaçısı olmaqdan hiss etdiyi məmnunluğu gizlətməyib. O, bu təcrübənin nadir olduğunu qeyd edir.

Ergenç rolu onun üçün xüsusi edən əsas məqamı izah edib. O bildirib ki, tarixi bir şəxsiyyəti bu qədər geniş yaş aralığında canlandırmaq hər aktyora qismət olmur. Aktyor vurğulayıb ki, "Heç bir aktyora tarixi bir şəxsiyyətin həm 26, həm də 71 yaşını canlandırmaq qismət olmur".

"Muhteşem Yüzyıl" serialı 2011-2014-cü illərdə yayımlanıb. Bu müddət ərzində Halit Ergenç mərkəzi obraz olan Sultan Süleyman obrazını canlandırıb. Bu rol onun karyerasının ən yadda qalan işlərindən biri sayılır.