Fərdi Tayfurdan 6 milyard miras qalıb

Yanvar ayının 2-də vəfat edən Türkiyənin əfsanəvi müğənnisi Fərdi Tayfurun vəkili ilə övladları arasında miras qovğası başlayıb. Vəkil mərhum sənətçidən böyük bir sərvət, yəni 6 milyard lirə dəyərində miras qaldığını açıqladı. Bu açıqlama mübahisəni daha da gərginləşdirdi, çünki bu böyük var-dövlətin kimə qalacağı hələ də qeyri-müəyyən olaraq qalır.

Vəkil bu böyük vəsaitdən sənətçinin övladlarına pay düşməyəcəyini bildirdi. O, müğənninin sağlığında uşaqlarını miras hüququndan məhrum etdiyini iddia edir. Onun sözlərinə görə, Fərdi Tayfur sahib olduğu sərvətin böyük qismini xeyriyyəçiliklə məşğul olan qurumlara bağışlayıb. Müğənninin ən böyük arzusu, dünyadan köçəndən sonra onun var-dövlətindən yoxsul insanların faydalanması idi.

Bu iddialara qarşı Fərdi Tayfurun qızı Tuğçe Tayfurun cavabı özünü çox gözlətməyib. O, dərhal sosial şəbəkə hesabında çıxış edərək qarşı tərəfi yalançılıqda və riyakarlıqda suçladı. Tuğçe Tayfur, "Uşaqları olduğu halda sən niyə Fərdi Tayfurun sərvətinin arxasınca düşmüsən?" deyə sərt bir sual ünvanlayaraq vəkilin motivlərini sorğuladı. Bu mübahisənin hüquqi nəticələri hələ də qeyri-müəyyəndir.