DSX Xəzərdə əməliyyat keçirdi – Vətəndaşlar xilas edildi

Dövlət Sərhəd Xidməti (DSX) Xəzər dənizinin Azərbaycan hissəsində köməksiz vəziyyətdə qalmış üç Azərbaycan vətəndaşını xilas edib. Bu hadisə barədə məlumat oktyabrın 31-də DSX-nin Sahil Mühafizəsinin Astara sahil nəzarəti şöbəsinə daxil olub. Saat 15:35 radələrində Kələdəhnə sahil nəzarəti bölməsinə gələn məlumata görə, balıqçı qayığı zədələndiyi üçün üç heyət üzvü dənizdə batma təhlükəsi ilə üz-üzə qalıb. Məlumatın alınmasından dərhal sonra təxirəsalınmaz tədbirlər görülməyə başlandı.

Dövlət sərhədinin mühafizəsində olan "Tufan" tipli sərhəd gəmisi cəld şəkildə müəyyən edilmiş koordinatlar üzrə hərəkətə keçdi. Gəmi qısa müddətdə hadisə yerinə çataraq axtarış-xilasetmə əməliyyatına başladı. Keçirilmiş operativ tədbirlər nəticəsində saat 17:15-də dənizdə köməksiz qalan şəxslər xilas edildi. Xilas edilən Astara rayon sakinləri 1980-ci il təvəllüdlü Ağabalayev Ruhid Murtuza oğlu, 1985-ci il təvəllüdlü Həsənov Namik Xanhüseyn oğlu və 1974-cü il təvəllüdlü Həsənov Arif Sürət oğlu idi. Onlar sərhəd gəmisinə təxliyə edilərək təhlükəsiz şəkildə sahilə çıxarıldılar.