Bu qanunda dəyişiklik ediləcək

"İnformasiya, informasiyalaşdırma və informasiyanın mühafizəsi haqqında" qanuna ciddi dəyişikliklər təklif olunur. Bu dəyişikliklər internet mühitində ictimai mənəviyyatı təhqir edən və cəmiyyətə açıqca hörmətsizlik ifadə edən hərəkətlərin edilməsini qadağan edəcək. Yeni layihə Milli Məclisin Hüquq siyasəti və dövlət quruculuğu, eləcə də İnsan hüquqları komitələrinin birgə iclasında müzakirə edildi.

Sənədə əsasən, kütləvi şəkildə nümayiş etdirilən əxlaqsız ifadələrin səsləndirilməsi, belə məzmun təəssüratı yaradan jestlərin edilməsi, yaxud bədən hissələrinin insan əxlaq normalarına və milli-mənəvi dəyərlərə zidd formada göstərilməsinə dair məlumatların yayılması qadağan ediləcək. Bu qadağa ölkədəki sosial şəbəkələrdə yayılan qeyri-etik və hörmətsiz məzmunun qarşısını almaq məqsədi daşıyır. Qanun layihəsinin hazırlanması son zamanlarda cəmiyyətə qarşı hörmətsizlik ifadə edən və mənəvi dəyərlərə uyğun olmayan paylaşımların geniş müşahidə olunması ilə bağlıdır.

Bu cür proseslər milli-mənəvi dəyərlərimizin deqradasiyasını sürətləndirir və cəmiyyətə mənfi təsir göstərir. Xüsusilə yeniyetmə və gənclər zərərli məlumata məruz qalır, onların davranış modellərində dəyişikliklər yaranır. Eyni zamanda, sosial şəbəkələrin iş prinsipi bu cür qeyri-etik paylaşımları daha geniş auditoriyaya sürətlə çatdırır, çünki platformalar istifadəçilərin diqqətini daha çox cəlb edən məzmunu önə çıxarır. Nəticədə, yaranan bu informasiya axını ictimai mənəviyyata ciddi zərər vurur.

Mövcud qanunvericilik yalnız müəyyən kateqoriyada qadağan olunmuş məlumatlara görə məsuliyyət nəzərdə tutur. Bu səbəbdən qanunvericilikdə dəyişiklik edilməsi mənəvi dəyərlərin qorunmasını gücləndirmək məqsədi daşıyır. Yeni qanun layihəsi yeniyetmə və gənclərin zərərli informasiyadan müdafiəsini gücləndirmək, internet mühitində məsuliyyət mexanizmlərini dəqiqləşdirmək üçün mövcud tənzimləməni təkmilləşdirəcək. Bu addım ölkənin informasiya məkanında etik normaların tətbiqini daha effektiv edəcək.