Bu qadınlara əlavə məzuniyyət günləri veriləcək

Hamilə qadınlara bəzi hallarda əlavə ödənişli məzuniyyət günləri veriləcək. Bu dəyişiklik Milli Məclisin Regional məsələlər komitəsinin bugünkü iclasında müzakirə edilən qanunlara təklif edilən dəyişiklik layihəsində əksini tapıb.

Təklifə görə, hamiləliyə və doğuşa görə məzuniyyətin doğuşdan əvvəlki hissəsinin müddəti uzadılacaq. Əgər uşaq doğuş gözlənilən gündən gec doğulsa, həmin fərq qədər ötən günlər üçün əlavə ödənişli məzuniyyət veriləcək. Bu uzatma doğuşdan sonrakı məzuniyyətin müddətini qısaltmayacaq. Bu yeni qayda, doğuşun gözlənilən tarixdən gecikməsi səbəbilə yaranan işləyən anaların məzuniyyət fərqlərini aradan qaldırmağa kömək edir.

Qeyd edək ki, hazırda işləyən qadınlara hamiləlik və doğuşdan sonrakı dövr üçün 126 təqvim günü (doğuşdan əvvəl 70 gün və doğuşdan sonra 56 gün) müddətində ödənişli məzuniyyət verilir. Doğuş çətin olduqda və ya iki, daha çox uşaq doğulduqda isə doğuşdan sonrakı məzuniyyət 70 təqvim gününə çatır. Kənd təsərrüfatı istehsalında çalışan qadınlar üçün bu müddətlər fərqlənir: normal doğuşda 140 təqvim günü (70 gün əvvəl, 70 gün sonra), çətin doğuşda 156 təqvim günü (70 gün əvvəl, 86 gün sonra), iki və daha çox uşaq doğulduqda isə maksimum 180 təqvim günü (70 gün əvvəl, 110 gün sonra) məzuniyyət nəzərdə tutulur.

Bu dəyişikliklərlə, ölkədə işləyən bütün qadınlar üçün doğuşla bağlı məzuniyyət hüquqlarının daha ədalətli tənzimlənməsi təmin edilir. Əsas məqsəd, doğuşun gecikməsi səbəbindən yaranan əlavə günlərin ödənişli şəkildə qarşılanmasıdır.