Azərbaycanda 17 yaşlı gəlinin ölüm səbəbi bilindi -YENİLƏNİB

Astarada toyundan qısa müddət sonra dünyasını dəyişən 17 yaşlı hamilə qadının ilkin ölüm səbəbi açıqlanıb. Bu dəhşətli hadisə ilə bağlı Astara rayon prokurorluğunda araşdırma aparılır. Astara rayon sakini olan, 2008-ci il təvəllüdlü Ə.İ.-nin Deqədi kəndində şadlıq saraylarından birində toyu olub.

Toydan dərhal sonra özünü pis hiss edən gəlin təcili olaraq Astara Rayon Mərkəzi Xəstəxanasına çatdırılıb. Həkimlərin bütün səylərinə baxmayaraq, onu xilas etmək mümkün olmayıb. TƏBİB-dən verilən məlumata görə, oktyabrın 28-i axşam saatlarında xəstəxanaya gətirilən pasiyent Təcili tibbi yardım şöbəsində hospitalizasiya edilib. Pasiyentin vəziyyəti çox ağır idi və o, kəskin tibbi müdaxilə tələb edirdi.

Həkimlər qadına 29 həftəlik hamiləlik, ölü döl, köndələn vəziyyət kimi diaqnozlar qoyublar. Ən ciddi problemlər isə anuriya, toksik ensefalopatiya və septiki şok idi. Bundan başqa, onda kəskin ağciyər, ürək və böyrək çatmazlığı aşkar edilib. Qadının müalicəsi Reanimasiya şöbəsində davam etdirilib, ona süni tənəffüs cihazı qoşulub. Tibb işçilərinin göstərdiyi bütün reanimasiya tədbirlərinə və çoxsaylı cəhdlərinə baxmayaraq, ertəsi gün səhər saatlarında pasiyentin bioloji ölüm faktı qeydə alınıb.

Ölüm səbəblərinin dəqiq müəyyənləşdirilməsi üçün cəsəd dərhal Məhkəmə Tibbi Ekspertiza və Patoloji Anatomiya Birliyinin Astara rayon şöbəsinə təhvil verilib. Hadisə ilə əlaqədar Astara rayon prokurorluğunun apardığı araşdırma davam edir.