Azərbaycan antiterror əməliyyatından əvvəl sülhməramlılara məlumat verib -Nazir

Azərbaycanın xarici işlər naziri Ceyhun Bayramov bildirib ki, 2023-cü ildə həyata keçirilən antiterror əməliyyatından 10-15 dəqiqə əvvəl Rusiya sülhməramlılarının Qarabağdakı komandanlığına bu barədə xəbər verildi. Nazir bunu İTV-yə verdiyi müsahibəsində açıqlayıb. O, əlavə etdi ki, bu addım sülhməramlıların təhlükəsizliyini təmin etmək üçün atıldı.

Nazir qeyd etdi ki, sülhməramlılara təhlükəsiz yerlərə, öz kazarmalarına keçməli olduqları bildirildi. Onlara xəbərdarlıq edildi ki, əks halda onların həyatı üçün təhlükə yaranacaq. Bayramovun sözlərinə görə, sülhməramlılar bu tələblərə, əsasən, riayət etdilər. Onların bu təlimata əməl etməməsi üçün heç bir əsasları yox idi, çünki Azərbaycan üç il ərzində onlara qanunsuz erməni silahlı qüvvələrinin fəaliyyətləri ilə bağlı dəfələrlə xəbərdarlıq etmişdi.

Xarici İşlər Nazirliyinin rəhbəri sülhməramlılara ərazilərin minalanması, istehkamların qurulması və silah-sursatın daşınması barədə xəbərdarlıqların edildiyini xatırlatdı. Buna baxmayaraq, sülhməramlılar bu məsələlərin öz səlahiyyətlərinə daxil olmadığını deyirdilər. Onlar qeyd edirdilər ki, onlara mandat verilməyib, bu səbəbdən sadəcə ümumi müşahidə aparırlar. Erməni əhalisi Qarabağı könüllü tərk etdikdən sonra sülhməramlıların orada nə ilə məşğul olması barədə suallar yarandı.

C. Bayramov vurğuladı ki, Azərbaycan bu məsələdə ciddi israr etmirdi, çünki missiyanın müddətinin məhdud olduğunu bilirdi. Moskvadan verilən mesajlara görə, erməni sakinlərinin bir hissəsinin geri qayıtmaq istəyi ola bilərdi və buna görə sülhməramlılara yenə də ehtiyac duyulacaqdı. Lakin qısa müddət sonra ermənilərin geri qayıtmaq fikrinin olmadığı aydın oldu. Sülhməramlılar da buradakı qalmağın məntiqsiz olduğunu gördülər. Onlara şərait yaradıldı və onlar mərasimlər keçirərək ərazini tərk etdilər.

Nazir yekun olaraq qeyd etdi ki, üçtərəfli bəyanatın şərtlərinə görə, tərəflərdən biri müddətin bitməsinə altı ay qalmış məlumat verməsəydi, sülhməramlıların fəaliyyəti növbəti beş il üçün uzadılmalı idi. Bu müddət 2025-ci ilin mayın 10-da bitirdi. Baxmayaraq ki, Rusiya sülhməramlıları artıq Azərbaycanda yox idi, hüquqi baxımdan gələcəkdə suallar yaranmaması üçün Azərbaycan 30 aprel tarixində Rusiya tərəfinə rəsmi nota göndərdi. Həmin notada vəziyyət tam əks etdirildi və onların mandatının tamamilə ləğv olunduğu bildirildi.