Anar Quliyev yeni qərar imzaladı

Dövlət Şəhərsalma və Arxitektura Komitəsinin Kollegiyası "Mehmanxana binaları. Layihələndirmə normaları"nı təsdiqləyib. Kollegiyanın sədri Anar Quliyev bununla bağlı yeni bir qərar imzalayıb. Bu normalar layihələndirilən və inşa edilən bütün mehmanxana binalarına və komplekslərinə şamil olunacaq.

Qərar həmçinin yenidən qurulan və əsaslı təmir olunan obyektlərə, eləcə də həmin obyektlərin ərazilərinin təşkilinə olan tələbləri müəyyənləşdirir. Lakin bu normalar tutumu 11 nömrədən (yaşayış otağından) az olan kiçik obyektlərə və mehmanxana olmayan digər yerləşmə vasitələrinin layihələndirilməsi, inşası və yenidən qurulmasına tətbiq edilməyəcək. Hündürlüyü 50 metrdən, yaxud yeraltı hissəsinin dərinliyi 15 metrdən böyük olan mehmanxana binaları isə xüsusi texniki şərtlər əsasında layihələndiriləcək və tikiləcək.

Yeni qaydalara görə, mehmanxana ərazilərinin tərkibində bir sıra zəruri hissələr nəzərdə tutulmalıdır. Bunlara yaşayış zonası, abadlaşdırılma elementləri ilə yaşıllıq zonası, daxili yollar, piyada səkiləri, minik avtomobilləri və səyahət avtobusları üçün duracaq meydançaları daxildir. Əlavə olaraq, yaşayış zonasından təcrid olunmuş təsərrüfat zonası ayrılmalıdır. Qeyd edək ki, kiçik və mini hotellər üçün səyahət avtobusları duracaq meydançalarının nəzərdə tutulması tələb edilmir. Əgər mehmanxana avtoduracaq xidməti təklif edirsə, hər səkkiz nömrəyə ən azı bir duracaq yeri nəzərdə tutulmalıdır. Motellərdə isə nömrə fondunun 50%-dən az olmayan miqdarda avtoduracaq yeri ayrılmalıdır. Həmçinin, xidməti işçilərin minik avtomobilləri üçün duracaqların sayı işləyənlərin ümumi sayının 10%-dən az olmamalıdır. Komitənin Ümumi işlər və ictimaiyyətlə əlaqələr şöbəsinə və Hüquq şöbəsinə bu Qərarın 3 gün müddətində Hüquqi Aktların Dövlət Reyestrinə daxil edilməsi üçün Ədliyyə Nazirliyinə təqdim edilməsi tapşırılıb.