Zelenski Starmerlə sabah Cenevrədə keçiriləcək görüşə hazırlığı müzakirə edib

Ukrayna Prezidenti Volodimir Zelenski Böyük Britaniyanın Baş naziri Kir Starmerlə telefon danışığı aparıb. Zelenski bu barədə öz teleqram kanalında məlumat verib. Onların uzun söhbəti olub, sülh prosesinin planlaşdırılmasında diplomatik işin bir çox incəliklərini müzakirə ediblər.

Zelenski bütün Britaniya cəmiyyətinə göstərilən dəstəyə görə minnətdarlığını bildirib və fəaliyyətlərini əlaqələndirməyə davam edəcəklərini qeyd edib. O, həmçinin məsləhətçilərin sabah İsveçrədə işləyəcəyini vurğulayıb. Bu heyətə Ukrayna, ABŞ və Avropa üçlüyü - Britaniya, Fransa və Almaniya - nümayəndələri daxildir.

Ukrayna lideri bildirib ki, Avropa ölkələrinin əksər liderləri Vaşinqton tərəfindən Rusiya-Ukrayna müharibəsinin sülh yolu ilə başa çatdırılması üçün irəli sürülmüş sülh planının müzakirəsinə qoşulmağa və zəruri dəstəyi verməyə hazırdırlar. Zelenski qeyd edib ki, hazırda müxtəlif səviyyələrdə məsləhətləşmələr davam edir və həqiqi, uzunmüddətli sülhə can atan hər kəsin fəallığı önəmlidir.

Daha əvvəl Starmer "Sky News"a verdiyi müsahibədə noyabrın 23-də Cenevrədə ABŞ, Ukrayna və Avropa ölkələrinin nümayəndələrinin iştirakı ilə Rusiya-Ukrayna münaqişəsinin həlli üzrə danışıqların keçiriləcəyini təsdiqləmişdi. Onun sözlərinə görə, Trampın planı yenidən nəzərdən keçirilməlidir. Starmer əlavə edib ki, 28 bənddən ibarət planda ədalətli və uzunmüddətli sülh üçün lazım olan bir neçə mühüm element var, lakin plan üzərində əlavə işlər aparılmalıdır. Onlar bu məsələni G20 sammiti çərçivəsində "istəklilər koalisiyası" ölkələrinin liderləri ilə də müzakirə ediblər.