Zaqatalaya qar yağır - FAKTİKİ HAVA

Ölkə ərazisinin bəzi yerlərində yağıntılı hava şəraiti davam edir. Milli Hidrometeorologiya Xidmətinin məlumatına əsasən, dekabrın 4-ü saat 10:00-a olan vəziyyətə görə, cənub zonasında güclü yağışlar müşahidə olunub. Lənkəran-Astara bölgəsində leysan xarakterli intensiv yağışlar qeydə alınıb.

Havanın soyuması ilə əlaqədar Zaqatalanın yüksək dağlıq ərazilərində (Əlibəy) qar yağır. Xidmət bildirir ki, hazırda yağan qarın hündürlüyü 1 santimetr təşkil edir. Düşən yağıntının miqdarına gəldikdə, cənub rayonları ön sıradadır. Lənkəranda 56 mm, Astarada isə 44 mm yağış düşüb. Lerikdə 4 mm, Yardımlıda 2 mm, Gədəbəy, Qax, Zaqatala, Qəbələ, Quba, Şabran və Göyçayda isə hər biri 1 mm olmaqla yağıntı qeydə alınıb.

Yağıntı ilə yanaşı, ölkənin müxtəlif ərazilərində qalın duman müşahidə edilir. Naxçıvan, Şərur, Sədərək, Gəncə, Şəmkir, Qax, Şəki, Zaqatala, Şamaxı, Qobustan, Altıağac, Quba, Qusar, Göyçay, Zərdab, Sabirabad və Lerikdə duman hökm sürür. Bu hava şəraiti nəqliyyatın hərəkətinə təsir edir, belə ki, görünüş məsafəsi 500 metrədək məhdudlaşıb. Sürücülərin diqqətli olmaları tövsiyə edilir.