Zaqatalada bir həftə əvvəl döyülən kişi xəstəxanada ölüb, bir nəfər tutulub - YENİLƏNİB

Zaqatalada bir həftə əvvəl ağır xəsarətlər alan və sonra xəstəxanada vəfat edən 41 yaşlı İsgəndər Yusif oğlu Musayevin ölümü ilə bağlı cinayət işində irəliləyiş var. Polis əməkdaşları dərhal həyata keçirdikləri əməliyyat tədbirləri zamanı hadisəni törətməkdə şübhəli bilinən iki şəxsdən birini saxlayıblar. Saxlanılan şəxs 36 yaşlı Rasim Abbasovdur. Polis Rasim Abbasovun İsgəndər Musayevi döyərək onun ölümünə səbəb olan şəxslərdən biri olduğunu bildirir. Bu qanlı hadisə oktyabrın 20-dən 21-nə keçən gecə baş vermişdi.

İsgəndər Musayev Zaqatala şəhər sakini idi. O, dostları ilə münaqişə zamanı ölümcül xəsarətlər almışdı. Musayev aldığı ağır zərbələr səbəbindən Zaqatala Rayon Mərkəzi Xəstəxanasının Reanimasiya şöbəsində müalicə alırdı. Bütün tibbi səylərə baxmayaraq, 41 yaşlı kişi axşam saatlarında dünyasını dəyişib. Hadisə rayonun Yuxarı Tala kənd inzibati ərazisində Musayevlə tanışları Rasim Abbasov və Hafiz Ramiz oğlu Hacıyev arasında baş verən dava zəminində yaranmışdı. Ölüm faktı təsdiqləndikdən sonra meyit müayinə edilməsi üçün Məhkəmə Tibbi Ekspertiza və Patoloji Anatomiya Birliyinin Zaqatala rayon şöbəsinə təhvil verilib.

Cinayəti törətdikdən dərhal sonra şübhəli bilinən şəxslər- Rasim Abbasov və Hafiz Ramiz oğlu Hacıyev qaçaraq gizlənmişdilər. Polis əməliyyatı nəticəsində Rasim Abbasov tutulsa da, digər şəxsin tapılaraq istintaqa təhvil verilməsi istiqamətində tədbirlər davam edir. Hazırda digər şübhəli Hafiz Hacıyevin axtarışı davam edir. Zaqatala rayon prokurorluğu bu ağır cinayət faktı ilə bağlı Cinayət Məcəlləsinin müvafiq maddəsi ilə cinayət işi açıb və ətraflı araşdırma aparılır.