Yetkin yataqların bərpası - SOCAR-ın fəaliyyətinin əsas prioritetlərindəndir

Yetkin yataqların bərpası SOCAR-ın gündəlik fəaliyyətinin əsas prioritetlərindən biridir. Dünya miqyasında neft hasilatının 70 faizdən çoxu artıq bu cür yataqlarda həyata keçirilir və bu nisbət artmaqdadır. Bakıda keçirilən SPE Xəzər Texniki Konfransında çıxış edən SOCAR nümayəndəsi Murad Seyidov bu sahədə şirkətin strategiyasını açıqlayıb.

O qeyd edib ki, yetkin yataqların idarə edilməsi sadəcə nəzəri müzakirə mövzusu deyil, əməliyyatların mərkəzində duran bir məsələdir. SOCAR ölkə daxilində 30-dan çox yatağı və 10.000-dən artıq quyunu idarə edir. Bu yataqlar struktur, məhsul tərkibi, infrastrukturun vəziyyəti və digər parametrlərinə görə bir-birindən kəskin şəkildə fərqlənir. Şirkət faktiki olaraq, yataqlar arasında son dərəcə geniş fərqlər diapazonu ilə üzləşir. Bu yataqlar fərqli yanaşma tələb etdiyi üçün, SOCAR son üç-beş ildə bu aktivləri səmərəli idarə etmək üçün dəyərə yönümlü strategiya tətbiq edir. Burada həcmlərin böyüklüyü yox, dəyər yaratmağa fokuslanmaq önəmlidir.

Yetkin yataqlarda bir sıra məhdudiyyətlər mövcuddur. Bəzi yataqlar artıq 100 ildən çoxdur ki, fəaliyyət göstərir. Bu vəziyyət təkcə yeraltı ehtiyatların azalması demək deyil, həm də köhnəlmiş təcrübələrin, məhdud bilik mübadiləsinin və infrastrukturun yaşlanmasının təsiri deməkdir. Quyuların və kəmərlərin köhnəlməsi əlavə çətinliklər yaradır. Belə bir şəraitdə şirkətin maliyyə, əməliyyat və resurs məhdudiyyətləri əsas amillərə çevrilir. Bu səbəbdən şirkət həcmlərə yox, məhz dəyərə fokuslanır. Bu yanaşma maliyyə qərarlarının və texniki tədbirlərin prioritetlərini, eləcə də əsas effektivlik göstəricilərini müəyyənləşdirir.

Yataqların bərpasına yanaşmanın əsasında insan düşüncəsi dayanır. Murad Seyidov bildirib ki, bərpa məqsədyönlü düşünən və dəyər yaratmağa köklənən insanlarla başlayır. Şirkətin əsas vəzifəsi işçiləri sadəcə icra etməyə yox, kreativ düşünməyə motivasiya etməkdir. Bu cür strateji və kadr yanaşması SOCAR-a yaşlı yataqlardan yüksək səmərə əldə etmək üçün kömək edir.