Xidmətdən buraxılan hərbi qulluqçular üçün işdən çıxarma pulu dəyişib

Nazirlər Kabineti xidmətdən buraxılan hərbi qulluqçular və ədliyyə orqanlarının əməkdaşları üçün ödənilən işdən çıxarma pulunun hesablanması qaydasında dəyişiklik edib. Bu qərar zabit heyətinə mənsub şəxslərə, gizirlərə, miçmanlara, müddətdən artıq həqiqi hərbi xidmət hərbi qulluqçularına, həmçinin daxili işlər, ədliyyə, gömrük, miqrasiya, fövqəladə hallar və vergi orqanlarının rəis və sıravi heyətinə pensiya təyin edilib verilməsi üçün uzun müddət xidmət vaxtının hesablanması qaydasına aiddir.

Dəyişiklik nəticəsində qaydanın adı da dəyişdirilib. Sənəd indi “Hərbi qulluqçulara və ədliyyə orqanlarının rəis və sıravi heyətinə ödənilən işdənçıxarma müavinətinin miqdarı və ödənilməsi şərtləri haqqında” adlanacaq. İndiyə qədər, məhkəmənin qərarı ilə xidmətdən buraxılanlar istisna olmaqla, hərbi xidmətdən başqa əsaslara görə buraxılmış zabitlərə, daxili işlər və ədliyyə orqanlarının orta, böyük və yüksək rəis heyətinə mənsub şəxslərə iki aylıq maaş həcmində işdən çıxarma pulu verilib.

Qəbul edilən yeni qərar hesablamanın bazasını dəqiqləşdirir. Dəyişikliyə əsasən, xidmətdən buraxılma zamanı hərbi qulluqçulara və ədliyyə orqanlarının rəis və sıravi heyətinə mənsub şəxslərə iki aylıq vəzifə və rütbə maaşı həcmində işdən çıxarma pulu veriləcək. Bu yeni metodika işdən çıxarma pulunun miqdarını müəyyənləşdirən əsas meyardır.