Vinisius Juniorun "Real"dan ayrılmaq istəməsinin səbəbi bəlli olub

Braziliya millisinin hücumçusu Vinisius Juniorun İspaniyanın "Real" klubundan ayrılmaq istəməsinin səbəbi bəlli olub. AS nəşrinin yaydığı məlumata görə, 25 yaşlı vinger Madrid təmsilçisi ilə vidalaşmağı ciddi şəkildə düşünür.

Bu qərarın arxasında yatan əsas məqam odur ki, futbolçu komandaya verdiyi töhfələrin qiymətləndirilmədiyini hiss edir. Həmçinin, onun baş məşqçi Xabi Alonso ilə münasibətləri getdikcə gərginləşir. Vinisius ispan mütəxəssisin oyun planlarına uyğun gəlmir, bu da tərəflər arasında ciddi narazılığa səbəb olur.

Komandadaxili gərginlik və münaqişənin miqyası "Barselona"ya qalib gəldikləri (2:1) La Liqanın X turunun oyunu zamanı daha da şiddətlənib. Vinisius Junior 2018-ci ildən "Real"da çıxış edir və onun klubla müqaviləsinin müddəti 2027-ci ilin yayında başa çatmalıdır. Ulduz futbolçunun hiss etdiyi dəyərsizlik və Xabi Alonso ilə yaranan gərginlik onun müqavilə müddəti bitmədən "Kral Klubu"nu tərk etmək istəyinə gətirib çıxarıb.